Булчуттарга уонна балыксыттарга аналлаах “Байанай” сурунаалы тэрийэн таһаарааччы Юрий Борисов хаһыс да сылын “Оо, собо барахсан!” диэн бэртээхэй дьаһалы иилээн-саҕалаан ыытар. Юрий Петрович быйыл ахсынньы 8 күнүгэр “Куруһаала” атыы-эргиэн кэккэлэригэр Саха сирин булчуттарын уонна балыксыттарын сойууһун итиэннэ Өрөспүүбүлүкэтээҕи норуот айымньытын уонна социальнай-култуурунай технология дьиэтин кытта тэрийэллэрин иһитиннэрдэ.
— Биһиги сорукпут – саханы саха оҥорбут, сэрии-сут дьылларыгар тыа сирин ыалларын үрүҥ тыыннарын өллөйдөөбүт, бүтүн норуоту хоргуйууттан өрүһүйбүт собо балыкка сүгүрүйүү итиэннэ өбүгэбит үйэлэр тухары илдьэ кэлбит үгэстэрин сөргүтүү, ыччат дьоҥҥо билиһиннэрии, — диир Юрий Борисов. — Муҥха – саха дьонун төрүт дьарыга. Муҥхалааһын уонна куйуурдааһын ньымалара сахаҕа эрэ бааллар. Собо балыгы саха дьоно былыргыттан сылы эргиччи бултаан, үссэнэн олордохторо. Бу биһиги өбүгэбит мындырын, тыйыс-тымныы дойдуга олохсуйарыгар, тыыннаах хааларыгар сөптөөх суолу тобулбутун көрдөрөр.
Бу күн “Куруһаала”-ҕа сарсыарда 10 чаастан быыстапка-дьаарбаҥка тэриллиэҕэ. Таһырдьа – балык уонна идэһэ атыыта. Иһирдьэ – норуот маастардара бэйэлэрин оҥоһуктарын көрдөрүөхтэрэ, атыылыахтара. Дьокуускай куорат эрэстэрээннэрэ собо балыктан бүлүүдэлэри астаабыттарын көрдөрүөхтэрэ. 12 чаастан Собо күнүн үөрүүлээхтик арыйыы сиэрэ-туома ыытыллыаҕа. Онтон ырыа-тойук, көрдөөх оонньуулар тэриллиэхтэрэ. Ол иһигэр үгэскэ кубулуйбут уонна дьон-сэргэ сэҥээрэр, күүтэр “Саамай бөдөҥ собо” күрэхтэһии ыытыллыа. Маныаха собо ыйааһына уонна уһуна аахсыллар.
Тэрээһиҥҥэ кэлбит дьоҥҥо сүүйтэриитэ суох лотерея тэрийиэхпит. Ол эбэтэр 1-дии мөһөөххө билиэт атыыласпыт дьон дьиэлэригэр булгуччу илии тутуурдаах барыахтара. Хас билиэти атыылаһарыҥ – хааччахтаммат. Оттон бу күн “Байанай” сурунаалга суруйтарбыт киһи лотереяҕа босхо оонньуур. Собо күнүн саамай бааттаах ыалдьыта Юрий Большаков “Охотничий двор” булт маҕаһыына бириискэ туруорбут мотуор иилиллэр, 25 тыһ. солк. сыаналаах “Тайга-290” эрэһиинэ оҥочотун сүүйүөҕэ.
Болҕойуҥ: саамай улахан собо
Байрон Николаевич Иванов 2015 сыллааҕы Собо дьоро киэһэтигэр Бүлүү Үгүлээтиттэн ыыппыт 2 киилэ 706 кыраамнаах соботун ким даҕаны куоһара илик.
Василий НИКИФОРОВ, «Саха сирэ» хаһыат, edersaas.ru