Собо күнүн супер-бирииһин Сургуулуктан төрүттээх куорат олохтооҕо сүүйдэ
Ааспыт субуотаҕа Дьокуускай куоракка “Куруһаала” атыы-эргиэн эрээттэригэр ыытыллыбыт “Оо, собо барахсан!” тэрээһин лотереятын муҥутуур бирииһин – Юрий Большаков дириэктэрдээх “Охотничий двор” маҕаһыын туруорбут мотуор иилиллэр, 25 тыһыынча солкуобай сыаналаах “Тайга-290” эрэһиинэ оҥочотун сүүйбүт куорат кырдьаҕас олохтооҕо, 80-ча саастаах Ольга Петровна Тарасова биир дойдулааҕым буолан соһутта даҕаны, үөртэ даҕаны.
— Мин 1939 сыллаахха Үөһээ Бүлүүгэ Сургуулук Ыйылаһыгар төрөөбүтүм. Ийэлээх аҕам эрдэ өлбүттэрэ. Сэрии тулаайаҕабын, — диир Ольга Петровна. – Отучча сыл сиэстэрэлээбитим. Кэргэним дойдутугар, Өлүөхүмэҕэ, отучча сыл олорон, үлэлээн баран, сиэннэрбитин көрсөөрү, Дьокуускайга уонтан тахса сыллааҕыта көһөн кэлбиппит. Лотереяҕа хаһан да сүүйбэтэх киһибин. Собо күнүгэр сыл аайы сылдьабын. Дьахталларга оҕуруонан моонньуга кэтэр киэргэли анньан-тиһэн оҥорор буоламмын быыстапкаҕа кыттабын. Быйыл биир билиэти 1 мөһөөххө атыылаһан киирбитим. Онтубар ити сүүйдүм. Үөрүүм муҥура суох. Тыыбын 14 саастаах сиэн уолбар анаатым. Бүлүүлүүр суолга даачалаахпыт. Онно чугас күөллээх. Хата, оҥочоломмучча, оҕонньорбунаан киирэн балыктыахпыт.
Василий НИКИФОРОВ, edersaas.ru