Соҕуруу Корея Чурапчы үнүстүтүүтүн кытары сөбүлэҥ түһэристэ...
Олох-дьаһах

Соҕуруу Корея Чурапчы үнүстүтүүтүн кытары сөбүлэҥ түһэристэ

Соторутааҕыта Чурапчытааҕы судаарыстыбаннай физическэй култуура уонна успуорт үнүстүтүүтүгэр Соҕуруу Кореяттан, Сирым төрүт тустуу бэдэрээссийэтин Бэрэсэдьиэнэ Пак Пал Юнг, юрист Вон Ил Ли уонна бырапыассар Но Те Чол үс киһи састааптаах анал бөлөх кэлэн ыалдьыттаата.


Ыалдьыттарбыт сүрүн соруктарынан, Чурапчытааҕы судаарыстыбаннай физическэй култуура уонна успуорт үнүстүтүүтүн салалтатын кытары бу кэлиҥҥи 2 сылга үөрэх былааныгар, наука уонна успуорт хайысхаларыгар хардарыта уопут атастаһыытыгар, устудьуоннары кытары үлэлэһиигэ сөбүлэҥ түһэрсиитэ буолла.

Маныаха биир сүрүн интэриэстэринэн, биһиги сахалар төрүт көрүҥмүт хапсаҕай буолара билиннэ. Инньэ гынан, биһиги устудьуоннарбытыгар, магистратураҕа үөрэнэ сылдьар ыччаттарга саҥа сиргэ тиийэн дьарыктанар кыах үөскээтэ. Холобур, устудьуон үнүстүтүүккэ бакалавры түмүктээн баран магистратураҕа туттарсан киирэр түгэнигэр, биир сыл Соҕуруу Кореяҕа тиийэн стажировканы ааһар кыахтанар. Ол инниттэн устудьуон кэриэй тылын үөрэтэр уонна хапсаҕайынан хайаан даҕаны дьарыктанар буолара ирдэниллэр.

Хардарыта сөбүлэҥи түһэрсии туһунан кэпсэтиһии өссө 2017 сыл балаҕан ыйыттан саҕалаан ыытыллыбыта. Сүрүн көҕүлээччилэринэн, Олимпийскай чөмпүйүөн, үнүстүтүүт көрөр-истэр харалтатын бэрэссэдээтэлэ, Ил Түмэн дьокутаата П.П.Пинигин уонна үнүстүтүүт ректора, улуус Хапсаҕайга бэдэрээссийэтин бэрэссэдээтэлэ И.И.Готовцев буолаллар.

Тас дойдуну кытары хардарыта сөбүлэҥ түһэрсии биһиги  спортсменнарбыт сайдыыларыгар улахан акылаат, күүс-көмө буоларыгар эрэлбит улахан. Итини таһынан бу дуогабар түһэрсиитэ бары таптаан көрөр, дьарыктанар көрүҥмүт хапсаҕай аан дойду таһымыгар тахсан биллэригэр биир сүрүн хайысха буолуо этэ.

Семен Жендринскэй, «Саха сирэ» хаһыат, edersaas.ru сайтка анаан.

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

8 − один =