Улуу Кыайыы 77 сылын көрсүү үөрүүтүн балысхана ааһа да илигинэ, ыам ыйын 10 күнүгэр Саһылыкаан ыччаттарын күүһүнэн туруорбут кэнсиэртэринэн Уус Алдан улууһун Суоттутугар гостуруоллаан бардылар.
Саһылыкаан 100-чэкэ нэһилиэнньэлээх, уһуйаан-оскуолалаах,тыа хаһаайыстыбатынан дьарыктанар Суотту учаастага. Саһылыкааттар төһө да ойдом олордоллор, олоҕу кытта тэҥҥэ хардыылаан,олох үөһүгэр үлэлии-хамныы сылдьаллара үөрдэр.
Оннооҕор сэбиэскэй кэмҥэ дьыл баччатыгар гостуруол кэлбитин өйдөөбөппүн. Соһуччу кэнсиэргэ Саһылыкаантан төрүттээхтэр Арыы-Тииттэн, Хоноҕортон тиийэ кэлэн, биир дойдулаахтарын дьоро киэһэлэригэр ытыстарын тыаһын харыстаабатылар.
Кэнсиэр хара саҕаланыаҕыттан таҥастара-саптара эриэккэһэ, сыанаҕа тутта-хапта сылдьыылара тута дьон болҕомтотун тарта. Салайааччы,кулууп сэбиэдиссэйэ уонна уран тарбахтаах иистэҥньэҥнэрэ Гузаирова Мариядора Софроновнаны тус билбэтэргин да, кини айар үлэтин-хамнаһын үрдүктүк сыаналыыгын.
14 ыччат сыанаҕа бииртэн биир омук араас үҥкүүтүн толорон, кэрэ-чуор куоластарынан ыллаан,көрдөөх сыаҥкалары оонньоон, ытыс тыаһын ылыахтарын ыллылар. «Мичээр»СК звукооператора Парников Илья Егорович уотун-күөһүн таба тутан, муусукаҕа харгыс таһаарбакка холбоон өссө киэргэттэ. Саһылыкаан ыччата чөл олоҕу тутуһара, кинилэр үҥкүүлүү сылдьан “солнышко” оҥороллоруттан, “сальто” тэбэллэриттэн көстөр.
Кулууппут төһө да сөрүүн буоллар, сырдык-кэрэ кэнсиэр сылааһынан сыдьаайан тоҥмотубут даҕаны. Көрөөччүлэр бары астынныбыт,үөрдүбүт. Бүтүүтүгэр сүһүөхпүтүгэр туран ытыспытын таһынан махталбытын биллэрдибит.
Кэрэ киэһэни бэлэхтээбит Саһылыкаан ыччаттарыгар дьолу-соргуну баҕаран, сэргэхсийэн,үөрэн-көтөн тарҕастыбыт.
Саһылыкаан инникилээҕин,кэскиллээҕин кэнсиэр көрдөрдө. Өссө да күүтэбит!
“Саха сирэ”, edersaas.ru анаан Иннокентий ПОПОВ-ОҔУРУОТТААХ