Соҕотоҕун 13 оҕону ииппит аҕа

Бөлөххө киир:

Андрей Васильевич Прудецкай — 13 оҕону соҕотоҕун ииппит аҕа. Ийэлэрэ Анисия Афанасьевна уон төрдүс оҕотун күн сирин көрдөрөөрү сылдьан суох буолбута. Василий эмдэй-сэмдэй 13 оҕону туппутунан хаалбыта, кыралара балтараа эрэ саастааҕа…
Аҕа барахсан, биир таммах арыгыны испэккэ, хара көлөһүнүнэн, хары күүһүнэн оҕолорун улаатыннарда, киһи хара оҥордо. Биллэн турар, оҕолорун иитэригэр элбэх ыарахаттары көрсүбүтэ. Бэйэтэ кыайарынан, сатыырынан барыларын атахтарыгар туруорда. Онон Андрей Васильевич собус-соҕотоҕун тулаайах хаалбыт көмүс чыычаахтарын, 13 оҕотун кынатын анныгар уктан, барыларын бииргэ илдьэ сылдьан, иитэн-үөрэттэрэн, олох аартыгар үктэннэрдэ. Олоххо тардыһар күүстээх санаатынан, дьулуурунан, барар сирэ баҕана үүтэ буолбут кэмнэри, ыарахаттары туораатаҕа.
Төһөлөөх түүн утуйбатаҕа, кырыымчык кыһалҕаттан санааҕа ылларбыта буолуой? Бэйэтэ эрэ биллэҕэ… Хаһан да үҥсэргээбэт, ытыы-соҥуу сылдьыбат эр киһилии майгытынан үгүстэргэ холобур буолар.
Андрей Васильевич “Хатыҥнаах” диэн сайыҥҥы оҕо үлэ-сынньалаҥ лааҕырын тэрийэн, бэйэтин оҕолорун бииргэ илдьэ сылдьан, үлэҕэ уһуйбута. Лааҕыр үлэтэ өрөспүүбүлүкэтээҕи куонкурустарга кыттан, 1-кы, 2-с миэстэҕэ сылдьыбыта. Бу лааҕырга элбэх оҕо кини илиитин иһинэн ааһан, үлэҕэ-хамнаска иитиллибитэ.

Ийэлэрэ суох да буоллар, көмөлөһө сыппыта… Биирдэ, түүлүгэр көстөн “кэһиибин уура сытабын, Ойбонукка тиий” диэбит. Онно 3 тайаҕы өлөрөн турар. Аар айылҕата киниэхэ булду анаан биэрэр. Ийэлэрэ түүлүгэр ыҥырдаҕына, “бурааныгар” олордо да, барар.

Андрей Васильевич 33 сыл сылгыһыттаабыта. Саха Өрөспүүбүлүкэтин тыатын хаһаайыстыбатын үтүөлээх үлэһитэ, “Гражданскай килбиэн” бэлиэ хаһаайына.

Быйыл алтынньы 15 күнүгэр А.В.Прудецкай 60 сааһын туолан, оҕолоро үбүлүөй тэрийдилэр. Улуус дьаһалтата – Дьокуускай куораттааҕы «Горняк» санаторийга путевканы, нэһилиэк — убаһаны, тыа хаһаайыстыбатын министиэристибэтэ бочуотунай грамотаны туттардылар. Киниэхэ анаан Үөһээ Бүлүүттэн, Намтан, Амматтан, Өймөкөөнтөн: «аанньал тэҥэ ытык аҕабыт, киэн туттабыт», «кырдьар сааскар кыһалҕаны билимэ», «холобур буолар, улахан буукубаттан суруллар аҕа» диэн истиҥ тыллаах эҕэрдэлэр кэллилэр.

Дьааҥы улууһун Табалааҕын олохтооҕо Андрей Васильевич Прудецкай — соҕотоҕун 13 оҕону ииппит, 15 сиэннээх, Саха сиригэр холобур буолар Ытык аҕа.
Киниэхэ өрөспүүбүлүкэ туох өҥөнү оҥордо, тугунан көмөлөстө?

Надежда Аржакова-Иванова.

+1
0
+1
0
+1
0
+1
0
+1
0
+1
0
+1
0