Биһиги бары кэриэтэ СНИЛС (страховой номер индивидуального лицевого счета) диэн докумуону бэркэ билэбит. Дьэ, ити докумуоммутун аны кирэдьиит ыларбытыгар көрдөөбөт буолуохтара. Бу туһунан Президент Путин кирэдьиити биэрэр уорганнар кирэдьиит историятын титульнай чааһыгар ыйымыахтарын сөбүн туһунан сокуоҥҥа илии баттаабыт. Маныаха Россия Биэнсийэҕэ Фондата бааннарга СНИЛС толору баазатыгар киирэллэрин аккаастаабыта төрүөт буолбут. Тоҕо диэтэххэ, киһи тус чахчытын уонна тустаах киһи туһунан иһитиннэриини биэрии бобулларын туһунан сокуоҥҥа олоҕурбуттар.
Кырдьык, СНИЛС диэн докумуоммутугар ааппыт-суолбут, хаһан төрөөбүппүт, булгуччулаах биэнсийэни страховкалааһын бырагырааматыгар регистрацияламмыт күммүт барыта ыйылла сылдьар. Бу докумуон киһи үлэлиирин тухары ыстааһын, үлэни биэрээчилэр киниэхэ биэнсийэ усунуоһун төһөнү төлөөбүттэрэ эҥин барыта түмүллэр сүдү суолталаах докумуонунан буолар. Уонна биэнсийэни анатыыга эмиэ олус наадалаах эбит.
Онон бааннар ити докумуону ирдииллэрэ тохтуур.
Женни Стрюкова, “Саха сирэ” хаһыат, http: //edersaas.ru/
+1
+1
+1
+1
+1
+1
+1