Д.К.Сивцев-Суорун Омоллоон аатынан Опера уонна балет Судаарыстыбаннай тыйаатырыгар Аҕа дойду Улуу сэриитин кыттыылааҕа, биллиилээх снайпер Иван Николаевич Кульбертинов төрөөбүтэ 100 сылын бэлиэтиир үөрүүлээх мунньах буолла.
edersaas.ru
Тэрээһиҥҥэ СӨ бырабыыталыстыбатын бэрэссэдээтэлин солбуйааччы Михаил Гуляев, СӨ Ил Түмэн Судаарыстыбаннай Мунньаҕын бэрэссэдээтэлин бастакы солбуйааччы, Хотугу сир, Сибиир уонна Уһук Илин табаһыттарын сойууһун бэрэсидьиэнэ Анатолий Добрянцев, Өлүөхүмэ улууһун баһылыга Виктор Васильев, СӨ байыаннай комиссара Артына Демир-Оол Иванович, снайпер И.Н.Кульбертинов уола Иван Кульбертинов, СӨ табаһыттарын ассоциациятын бэрэссэдээтэлэ, “Тээнэ” родовой община баһылыга Арсентий Николаев, оҕунан ытыыга Арассыыйа маастара, XIV сайыҥҥы Паралимпийскай оонньуу боруонса призера, Европа уонна аан дойду рекордсмена, аан дойду үс төгүллээх чөмпүйүөнэ, И.Н.Кульбертинов сиэн балта Степанида Артахинова, биир дойдулаахтара, аймахтара кытыннылар.
Үөрүүлээх мунньах иннинэ биллиилээх снайпер Иван Кульбертинов олоҕун, сэриигэ кыргыһыытын туһунан кэпсиир быыстапканы тэрийдилэр. Манна кини туттубут мала, хаартыскалар, кинигэлэр тэлгэммиттэр.
“Бүгүн номоххо киирбит снайпер Иван Николаевич Кульбертинов төрөөбүтэ 100 сылын бэлиэтиир үөрүүлээх мунньахха муһуннубут. Иван Николаевич олоҕо төрөөбүт дойдуга бэриниилээх буолуу холобурун көрдөрөр. Улуу Өктөөп өрөбөлүүссүйэтин күнүгэр төрөөбүтэ Улуу Судаарыстыба историятыгар бэлиэ суолу хаалларарга түстээбитэ. Үлэһит, сымса, сылбырҕа, тулуурдаах, дьүккүөрдээх майгыта үрдүк кылаастаах булчут буоларыгар көмөлөспүтэ. Сэрии, Иван Николаевич бултуур саатын бойобуой бинтиэпкэҕэ солбуйарыгар күһэйбитэ. Сэриигэ бэйэтэ тылланан туран барбыта. Бастакы наҕараадатын – “Хорсунун иһин” мэтээли от ыйын 18 күнүгэр 1943 сыллаахха ылбыта. Сэбиэскэй кэм биир чаҕылхай снайпера этэ. Сэрииттэн 1947 сыллаахха эргиллибитэ. Олохтон 1993 сыл олунньу 13 күнүгэр барбыта. Көмүс уҥуоҕун төрөөбүт Тээнэтигэр (Өлүөхүмэ улууһа) кистээбиттэрэ. Тиһэх суолугар кинини иккис кэргэнэ, эбэҥки фольклорун толорооччу Анна Андреевна Ильинова атаарбыта. Иван Кульбертинов аатын Тээнэ эбэҥки национальнай оскуолатыгар иҥэрбиттэрэ. Өлүөхүмэ куоракка кини аатынан уулусса баар. Өлүөхүмэҕэ уонна Тээнэҕэ пааматынньык туруорбуттара”, — диэн Михаил Гуляев бэлиэтээтэ.
Үөрүүлээх мунньах кэнниттэн мустубут дьону П.А.Ойуунускай аатынан Саха академическай уонна Олоҥхо тыйаатырдарын артыыстара, “Туймаада” ансаамбыл кэрэ куолара, “Чоруода” эбэҥки норуодунай фольклорнай ансаамбыл (Тээнэ, Өлүөхүмэ улууһа), Өлүөхүмэ көмүс куоластаах ырыаһыттара, о.д.а. эҕэрдэлээтилэр.
Людмила ПОПОВА, “Саха сирэ” хаһыат, edersaas.ru
Ааптар хаартыскаҕа түһэриитэ.