Маны аах Уопсастыба

«Смотри, это Россия!» куонкурус кыайыылаахтара билиннилэр

Бүгүн, ахсынньы 29 күнүгэр,  «Смотри, это Россия!» диэн  бүтүн Арассыыйатааҕы куонкурус кыайыылаахтарыгар  наҕараадалары туттарыы үөрүүлээх быһыыга-майгыга ыытылынна.

Быйылгы тэрээһиҥҥэ «Легенды моего региона»  диэн  видеокроссиҥҥа  85 эрэгийиэнтэн 18 тыһыынча оскуола үөрэнээччитэ кытынна, этэргэ дылы, Калининградтан  саҕалаан Камчаткаҕа диэри…

«Икки сыл иһигэр куонкурус  дьон интэриэһин, болҕомтотун олус тарта, дойду бары муннугуттан кытталлар. Куонкурус бэйэтин тула элбэх оҕону, дьону-сэргэни түмтэ», — диэн Ил Дархан Айсен Николаев эрдэ кыттааччылары кытары онлайн-көрсүһүүгэ санаатын эппитэ.

Видео-аккырыыккаларга оҕолор төрөөбүт дойдуларын кэрэ айылҕатын, ураты көстүүлэрин, эрэгийиэннэрин олохторун-дьаһахтарын, сиэрдэрин-туомнарын  устан ыыппыттара дьон-сэргэ болҕомтотун тарта. Куонкурус алта кыайыылаахтарын норуот  куоластааһына быһаарда.  Ону тэҥэ, иккис миэстэни ылбыт алта хамаанда СӨ Ил Дарханын  анал бирииһин ыллылар.  Алта номинацияҕа  30 хамаанда лауреат үрдүк аатын ылары ситистилэр.  Санатар буоллахха,  бу тэрээһини ыытар туһунан идиэйэни  Дьокуускайдааҕы классическай гимназия  үөрэнээччитэ Кирилл Горохов   эппитэ.

«Смотри, это Россия!» диэн бастакы видеокроссинг 2020 сыл күһүнүгэр  Ил Дархан Айсен Николаев быһаччы өйөбүлүнэн,  Саха сирин  актыбыыс оҕолорун хамсааһынын көҕүлээһининэн ыытыллыбыта. Онон быйылгы тэрээһин иккис сылын буолла.  Куонкуруһу 15 тэрилтэ өйөөтө, ол истэригэр РФ  Үөрэхтээһинин  министиэристибэтэ,  «Сириус» үөрэхтээһин киинэ, уо.да.а. бааллар.

Норуот куоластааһынынан  алын саастаах бөлөхтөргө  «Якутяночка» (Саха сирэ) уонна «Исток» (Краснодарвскай кыраай) хамаандалара бастаатылар.  Орто саастаахтарга «Айыы» (Саха сирэ) уонна  Нуучча култууратыгар оҕо академиятын (Москва) хамаандалара инники күөҥҥэ таҕыстылар.  Оттон улахан бөлөхтөргө «Бивни Якутии» (Саха сирэ) уонна  «Dream Team» (Нижегородскай уобалас) хамаандалара бастаатылар.  Ил Дархан анал бирииһинэн «Мамонтята Якутии», «Северные лучики», «Наследники Дюпсюн» (Саха сирэ), ону тэҥэ,  «Гусята» (Москва), «Поколение Z» (Краснодарскай кыраай) уонна «Степная Пальмира»  (Оренбургскай уобалас)  хамаандалара наҕараадаланнылар.

 

0
0
Telegram @edersaas20