Слава оччолортон да сөхтөрөрө элбэҕэ
Олох-дьаһах

Слава оччолортон да сөхтөрөрө элбэҕэ

“Чороон” бастакы састаабын мусукаана Вячеслав Романович Саввин туһунан ахтан-санаан ааһыахпын баҕарабын.

edersaas.ru

Роман Максимович Саввин Чурапчы улууһун Дириҥ орто оскуолатыгар дириэктэринэн ананан кэлэн, Хоптоҕо нэһилиэгэр уонна оскуолаҕа улахан сэргэхсийиини таһаарбыта. Рома уонна Славка диэн уолаттара байааҥҥа оонньууллар этэ. Онон да буолуо, биһиги, оскуола үөрэнээччилэрэ, үҥкүүгэ бараары субуотаны кэтэһэр буолан хаалбыппыт.
Мин аҕам Михайлов Василий Семенович-Үгүрүө Баһылай оһох оттор буолан, оскуолаҕа кыбыллан олорбуппут. Славкалаах биһигиттэн чугас, уулусса нөҥүө олохсуйбуттара. Мин кинилэртэн арахпат буолбутум, соһуйарым да элбэҕэ. Бастатан туран, дьиэлэрэ ырааһа сөхтөрөрө. Ийэлэрэ атаххын сотун диэтэҕинэ, эмиэ соһуйарым. “Адьас хамыһаардар эбит”, — дии саныырым.

Иккиһинэн, Славка аахпыта, билэрэ-көрөрө элбэҕинэн сөхтөрөрө. Дьиэ кэргэнинэн кинигэ тутан баран, чааһы-чааһынан олороллоро. Билигин смартфоннаах ыал курдук, дьиэлэрин иһэ уу-чуумпу буолара. Кинилэргэ холоотоххо, мин чуумпуран олорон адьас аахпат эбиппин, дьиэбит да, оскуола да иһэ оргуйан олороро.
География учуутала Петр Гаврильевич Старостин тэрийэн, атын сирдэргэ туристыы барбыппыт хаһыс да сыла буолбута. Онон, оройуон киинигэр Чурапчы сэлиэнньэтигэр киирэн күрэхтэһэрбит. Славка миэхэ тириэнэрдээбитэ. Саас сылыйда да хайыһардатар, хаар уулунна да сүүрдэр этэ. Дьиҥинэн, мин ол иннинэ “чуурбун биэрэн», спортан адьас тэйэ сылдьар кэмим этэ. Тоҕо диэтэххэ, көххө тустан көрөөрү гыммыппар, сүнньүбүн тосту эрийэ сыспыттара. Интэринээккэ боксаҕа үөрэниэх буолбуппар, сирэйбин лэппиэскэ курдук хаптаччы сынньан, сарсыҥҥытыгар күөх баламах баллаччы иһэн тахсыбыта. Онтон сүүрүүгэ сүүс миэтэрэҕэ саҥа ортолоон истэхпинэ, хайы сах биэтэккэ тиийбиттэрэ эрэ баар буолара. Ол иһин, Славкаҕа: »Миигин дьарыктаан да туһа суох», — диирим. Онуоха киһим: “Долгуйума, дьарыгын таптахха, сүүрүүгэ баҕас син барсыаҥ этэ. Уһуҥҥа сүүрүүгэ күүскүн үллэрэ үөрэн, эн Чапай курдук, бастаан наһаа күүскэ барар эбиккин. Ол иһин, ити биэтэк диэки быстан хаалаҕын, ортоку сырыт, биэтэккэ биирдэ дьэ, түһүнэн кэбиһээр”, — диэн үөрэппитэ.
Мугудайга тиийэн бэрэбиэркэлээбиппитигэр, “Бэрт!» диэн буолбута. Билигин ол алаас күөл буолан хаалбыт. Түмүгэр ориентированиеҕа оройуоҥҥа чөмпүйүөннээн, куоракка иккитэ күрэхтэспиппит. Аны куоракка сылдьан, киһим нууччалыы олус ыраастык саҥарарын эмиэ сөхпүтүм. Оттон мин: “Вот это, вот это…» дииртэн ырааппатах киһи этим.
Күрэхтэһэргэ кэтэр таҥаһым, куораттыыр харчым да суоҕа. Онуоха Славка таҥас уларсыбыта уонна бары да кини харчытынан барарбыт. Славкалыын “Урал» матасыыкылынан 30 килэмиэтир ыраах сытар оройуон киинигэр, Чурапчыга элээрдэрбит бэйэтэ романтика буолара.

 

Москваҕа бииргэ сылдьыбыт кэмнэрбит

1969 сыллаахха оскуоланы бүтэрээт, алҕас иккис хомуурга Щепкиҥҥэ киирэн, Москваҕа 5 сылга үөрэнэ барбытым. Устудьуоннуу сылдьан, биир сайын Чурапчы ыһыаҕар Славка, Махно, Вова Макаров, Керемясов гитаранан английскайдыы ыллаан, сөҕүмэр ситиһиилэммиппит.
1973 сыллаахха быһыылааҕа, Славка “Чороон» ансаамбылы кытары Москваҕа үөрэнэ кэлбиттэрэ. Биирдэ Саҥа дьыл саҕана ВДНХ-ҕа “Золотой колос» эрэстэрээҥҥэ дискотекаҕа Славалыын нууччалыы, дьоппуоннуу, английскайдыы ыллаан, “Гран при» ылан турабыт.
Миигин ,,Чорооҥҥо» ыллыы кэл дииллэрэ да, барбатаҕым. Саас биир дойдулаахтары кытары көрсүһэр мойуопкаҕа гитарабытын илдьэ сылдьарбыт. Көрдөстөхтөрүнэ, “У моря, у синего моря”, “Подмосковные вечера», ,»Сезон любви», «Долгожданной гитаре» ырыалары толорорбут.
Билигин, сааһыран баран санаатахха, Славка Саввин мин оскуолатааҕы уонна устудьуон сылларбар саамай чаҕылхай, кэрэҕэ уһуйбут доҕорум эбит…

”Саха сирэ” хаһыакка, edersaas.ru саайтка анаан Куприян МИХАЙЛОВ, СӨ үтүөлээх артыыһа

 

1
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

19 − десять =