2017 сыллаахха Ыалдьыттары көрсүү ассоциациятын салалтатын көҕүлээһининэн ас астыыр тэрилтэлэр бастакы өрөспүүбүлүкэтээҕи пуорумнара буолан ааспыта.
Тэрээһини ыытар уопсастыбаннай тэрилтэ салайааччыта Татьяна Тымырова бу олус суолталаах пуорум туһунан бу курдук кэпсээтэ:
— Бу тэрээһин чэрчитинэн асчыттарга анаан араас мастар-кылаастар тэриллэллэр. Эрэстэрээннэр, кафелар үлэһиттэрэ мустан санаабытын атастаһабыт, уоппуппутун үллэстэбит.
Быйыл от ыйын 21 күнүгэр — Эргиэн үлэһиттэрин күнүгэр ресторатордарга, урбаанньыттарга, управляющайдарга, шеф-пуобардарга уонна менеджердэргэ анаан Рестотур тэрийдибит.
Урбаанньыттары “Traveler’s Coffee” кофейняҕа, “Сладкие мечты” кондитерскай бэкээринэҕэ, “Күөх куорат («Зелёный город”) эрэстэрээҥҥэ , “Аврора” Сибиир куукунатын эрэстэрээнигэр уонна “Атласовтар уһаайбалара» этнокомплекска сырытыннардыбыт.
Дьокуускайтан, Намтан, Ытык Күөлтэн, Өлүөхүмэттэн, Белай Гораттан, Майаттан ресторатор-урбаанньыттар кыттыыны ыллылар.
Тэрээһин олус интэриэһинэй түмүктээх буолла — “Сладкие мечты” кондитерскай бэкээринэ франшиза курдук саҥа бырайыагы олоххо киллэриэҕэ. Ол эбэтэр улуустарга бу бренд-фирма филиаллара аһыллыахтара. Бэйэ оҥорор бородууксуйатын элбэтии (импортозамещение) курдук тирээн турар сорук кэмигэр бу сонун сүүрээн бастыҥ холобурунан буолар.
Елена ПОТОЦКАЯ, «Саха сирэ» хаһыат.
Хаартыска — Татьяна Тымырова тиксэриитэ.