Бүгүн Ил Дархан Айсен Николаев «Сколково» пуонда бырабылыанньатын салайааччыта Игорь Дроздовы кытта көрүстэ.
2019 сылтан “Технопарк Якутия” — «Сколково» пуонда эрэгийиэннээҕи оператора. Бу дьыл ыам ыйыгар Саха сирэ уонна «Сколково» инновационнай сайдыы эйгэтигэр бииргэ үлэлээһиҥҥэ уонна 2032 сылга диэри интеллектуальнай үлэҕэ тустаах түмүгү ситиһэргэ сөбүлэҥ түһэрсибиттэрэ. Бүгүҥҥү көрсүһүүгэ бииргэ үлэлээһин түмүгүн таһаардылар, үлэ саҥа хайысхатын торумнаатылар.
«Пуонданы кытта үлэ IT-хайысхаҕа улахан сайдыы олугун уурда. Ол эбэтэр ааспыт сыл түмүгүнэн IT-бородууксуйаны оҥорон таһаарыыга Саха сирэ дойдуга 9-с миэстэни ылла», — диэн бэлиэтээтэ Ил Дархан Айсен Николаев.
Оттон Игорь Дроздов “Саха сирэ Арассыыйаҕа IT-киининэн буолара саарбаҕа суох. Бу Сколкованы кытта ыкса сибээстээхтик үлэлээн, технологиялары сайыннарыыга инники күөҥҥэ сылдьар эрэгийиэн”, — диэн Ил Дархан этиитин бигэргэттэ.
Өрүттэр Арктика сайдыытыгар туһуламмыт кэккэ кэскиллээх хайысхалары дьүүллэстилэр.
Маны тэҥэ, Саха сиригэр ыытыллар “Мин идэм – IT” курдук куонкуруһу дойду атын эрэгийиэннэригэр тарҕатар туһунан сүбэлэстилэр. “Үлэ кыбартаала” креативнай кластер, “Биоцентр” курдук “Якутия Технопаарка” резиденнэрин үлэлэрин эмиэ ырыттылар.
Онон «Сколково» уонна СӨ инновация сайдыытыгар пуондалара бииргэ үлэлэһэр акселерационнай бырагыраамаларыгар олоҕуран, өрөспүүбүлүкэ сүрүн тэрилтэлэрэ «Сколково» индустриальнай партнерын статуһун ылыахтара.
«Сколково» пуонда салайааччыта Игорь Дроздов Саха сирин ураты сонун бырайыактарын кытта сиһилии билсэн баран, “Үлэ кыбартаала” креативнай кластеры өйүөх буолла.
Елена ПОТОЦКАЯ, “Саха сирэ” хаһыат.
Хаартыска — Андрей Сорокин, СИА.