«Skills Camp»: оҕолор айымньылаах салаа бастакы чыпчаалларын дабайаллар

Айымньылаах, сайыннарар (креативнай) индрустрияны сэргиир, сэҥээрэр сүүстэн тахса оҕо мустан, бу күннэргэ «Skills Camp» диэн үөрэтэр-бырайыактыыр симиэнэҕэ дьарыктана сылдьар. Бу бырайыагы Үүнэр көлүөнэ тус сыаллаах пуонда “Кэлэр кэскил туһугар” диэн бырагырааматын нөҥүө, АЛРОСА үбүн суотугар тэрийэн үлэлэтэр.

edersaas.ru

Cайыҥҥы оскуола Хаҥалас улууһун Чапаев бөһүөлэгэр түстэммит Билим аччыгый академиятын үөрэнэр куорпуһугар үлэлиир. “Үүнэр көлүөнэ паарката” бырайыак чэрчитинэн, тус сыаллаах Үүнэр көлүөнэ пуондата уонна Билим аччыгый академиятын кытары кыттыһан тэрийбиттэрэ. Сонун лааҕыр оҕолорун Москубатааҕы обургу саастаах оҕолорго ананар «Deti MBA» диэн биисинэс-оскуолаттан кэлбит сүрүннүүр эспиэрдэр дьарыктыыллар, билиигэ сирдииллэр.

«Күн бүгүн биһиги тутаах уонна бэлиэ суолталаах бырайыактарбытыттан биирдэстэрэ – Үүнэр көлүөнэ паарката буолар. Билигин паарка Дьокуускайга түстэниэхтээх былаһааккатын оҥоро, бэлэмнии сылдьаллар. Ыытыллар үлэни 2025 сылга түмүктээн, тустаах туонаны ити сыл арыйар былааннаахпыт. Бу үлэни биһиги пуондабыт АЛРОСА үбүгэр ыытар. Тустаах паарка атыттартан уратытын, иһигэр былааннанар тутуулар ис-тас өттүлэрэ, суолталара араастаһарын урут да кэпсээн турабыт. Күөх үүнээйилэри, оҕо уонна успуорт былаһааккаларын сэргэ ыччакка анаммыт Үөрэтэр киин олохтонуо. Онно креативнай индустрия хайысхатынан араас эгэлгэ элбэх, ол иһигэр үөрэтэр-сайыннарар ис хоһоонноох тэрээһиннэр буолуохтара. Билигин биһигини кытта номнуо бииргэ үлэлэһэ сылдьар партнердардаахпыт: СӨ Национальнай бибилэтиэкэтэ, Эбии үөрэхтээһин киинэ, араас кэмиэрчэскэй уонна кэмиэрчэскэйэ да суох тэрилтэлэр.

Ол быһыытынан, биһиги тутуу оҥоһуллан бүтэр, силигэ ситэр 2025 сылын кэтэһэн олорбокко, креативнай туонаҕа дьарыктыыр уонна үлэлиир дьон түмсүүлэрин таҥар, түмэр үлэни эрдэттэн саҕалаабыппыт. Кинилэр истэригэр педагогтар, маастардар, араас идэлээхтэр уонна, биллэн турар, оҕолор бэйэлэрэ эмиэ бааллар. Кинилэр билиҥҥитэ тустаах хайысхаҕа бастакы сэмэй хардыылары оҥорор эбит буоллахтарына, төһө да саастара кыратын иһин, бэлиэр үс сылынан бэйэлэрэ ситиһиилээх исписэлиис буола үүнэн тахсыахтара. Ол иһин биһиги бу түмсүү бүтүннүү тутуспутунан саҥа олохтоммут былаһааккаҕа көһүөн баҕарабыт. Ону сэргэ  кэккэ хайысхаҕа араас тэрээһини бэлэмниибит. Холобур, медиа, урбаан, кулинария тэрээһиннэрэ, араас хабааннаах күрэхтэр буолуталаабыттара. Дьэ, ол хайысхалары барытын киэҥник хабар «Skills Camp» лааҕыры Өктөмнөөҕү Билим аччыгый академиятын сиригэр-уотугар тэрийдибит. Кэнэҕэһин да биһиги пилотнай үөрэтии бырагыраамаларын маннык сайыҥҥы лааҕырдарга түмэр буолуохпут. Олорго эмиэ Саха сирин эрэ буолбакка, Арассыыйа уонна аан дойду таһымнаах эспиэрдэр кыттыахтара», – диэн СӨ Тус сыаллаах Үүнэр көлүөнэ пуондата кэммиэрчэскэйэ суох тэрилтэ  генеральнай дириэктэрэ Владимир Егоров кылгастык билиһиннэрдэ.

Бу сайыҥҥы оскуола иһинэн оҕолор уон күн устата айымньылаах уонна сонуну-саҥаны торумнуур ураты эйгэҕэ сылдьаллар. Дьарыктарын бырагыраамата балай эмэ киэҥ. Сыала-соруга —  креативнай индустриянан ылсан дьарыктанар баҕаны көҕүлүүр, итиннэ сыһыаннаах идэлэргэ оҕолору интэриэстиир аналлаах. Интерактивнай бырагыраама оҕолор толкуйдуур дьоҕурдара сайдарыгар, билиилэрэ-көрүүлэрэ кэҥииригэр уонна успуорт, эт-хаан өттүнэн сайдалларыгар бигэ тирэх, олук буолар. Кэрэхсэбиллээҕэ, лааҕыр сорох кыттыылаахтара бу дьарыктарга хайыы үйэ элбэҕи баһылыы, үөрүйэхтэнэ охсон, айымньылаах үлэлэрин тупсарыыга ылбыт сатабылларын туһана сылдьаллар.

«Skills Camp» – аныгы кэм киэҥ ис хоһоонноох уонна ураты туһалаах лааҕыра.

ххх

«Биһиги  обургу оҕолорго “detiMBA” биисинэс-оскуолабыт кыра уонна обургу оҕолорго биисинэскэ үөрүйэхтэрин сайыннарарга ананар.

Биһиги манна лааҕыр хайысхаларын чэрчитинэн  биисинэс кыахтарын туһунан кэпсииргэ кыһалынныбыт. Кинилэр талбыт идэлэрин кыахтарын уонна ону хайдах сайыннарыахха, инникитин олоххо киллэриэххэ сөбүн туһунан кэпсээтибит.

Уопсайынан, бөдөҥ тэрилтэлэр, чуолаан АЛРОСА курдук бырамыысыланнас хампаанньалара  эрэгийэн сайдыытыгар үп-харчы көрөллөрө, үүнэр көлүөнэҕэ кыһаллаллара олус кэрэхсэбиллээх. Ити чуолаан, оҕолор биһиги инникибит буоларын туһунан этэрбитигэр сөп түбэһэр. Биһиги Саха сиригэр АЛРОСА Үүнэр көлүөнэ тус сыаллаах пуондатын нөҥүө бу уонна да атын бырайыактары  үбүлүүрүн көрдүбүт.  Өйөбүл, хардарыта бииргэ үлэлээһин уонна коммуникация нөҥүө. Дойдуга бу курдук элбэх кыах баарын көрүөҕү баҕарыллар уонна  дойдубутугар обургу оҕолор сайдалларын туһугар АЛРОСА бырамыысыланнас бөдөҥ хампаанньаларыгар холобур буолар кыахтаах. Биһиги манна сылдьан баран эһиги обургу оҕолоргутугар саарбахтаабаппыт туһунан эрэллээхтик этиэхпитин сөп, өрөспүүбүлүкэ эрэллээх көлүөнэлээх.

Биһиги араас бырагыраамалары үрдүк таһымнаахтык баһылаабыт уонна сакаас ылар, харчы өлөрөр кыахтаах оҕолору көрүстүбүт. АЛРОСА көмөтүнэн ону итэҕэйдибит, — диэн обургу оҕолорго «detiMBA» биисинэс-оскуола Москватааҕы офиһын салайааччы  Жора Меджлумян кэпсээтэ.

Эспиэр тылын бигэргэтэн, биһиги хаачыстыбалаах виртуальнай 3D-моделлары оҥорор Арсен Поповы кытары кэпсэттибит.

— Мин наадалаах бырагырааманы туттарга үөрэнэрбэр сылтан кыра бириэмэ наада буолбута. Дьиҥэр, уруһуйдуур үөрүйэҕим эбэтэр уус-ураннык көрөр ураты дьоҕурум да суох. Арай, итиннэ үөрэнэр туһугар күүскэ үлэлээбитим. Уустуга суох 3D-моделлары сакааска оҥорон, харчы өлөрөбүн. Билигин мин муҥутуур рекордум – биир моделтан 20 тыһыынча солкуобай.

14 саастаах обургу оҕоҕо куһаҕана суох дуу?

«Саха сирэ», edersaas.ru сайтка анаан  Андрей ШИЛОВ суруйуутуттан тылбаас