Ситимнээх үөрэхтээһин “бастакы хараҥаччылара” Алданнаатылар
Быйылгы, 2019-2020 үөрэх дьылыттан Саха Өрөспүүбүлүкэтин сорох орто анал үөрэхтэрин кыһаларыгар “ситимнээх үөрэхтээһин” (сетевое обучение) диэни киллэрбиттэрэ. Дьокуускайдааҕы индустриальнай-педагогическай кэллиэскэ тустаах бырагырааманан үөрэххэ киирбит устудьуоннара Алданнаатылар.
СӨ үөрэҕин уонна наукатын миниистирин солбуйааччы Ньюргуна Соколова: “Үлэ миэстэтэ бырамыысыланнас оройуоннарыгар баар, абитуриеннар үгүстэрэ тыа улуустарыттан сылдьаллар. Онон, бары даҕаны Дьокуускай куоракка үөрэнэ хааларга дьулуһаллар. Ити кыһалҕаны таба көрөн, бырабыыталыстыба бэрэссэдээтэлэ Владимир Солодов көҕүлээһининэн, ситимнээх бырагыраама киирэн эрэр”, — диэн иһитиннэрбитэ.
Тустаах бырагыраамаҕа хапсыбыттар, Дьокуускайга түөрүйэтин үөрэтэн баран улууска тэрилтэҕэ тиийэн быраактыкатын бараллар. Үөрэхтэрин бүтэрдэхтэринэ үлэ миэстэтин кэбэҕэстик булалларыгар көмөлөөх. Итиэннэ ситимнээх бырагыраамаҕа хапсыбыт устудьуоннар уопсайынан хааччыллаллар. Судургутук өйдөөтөххө, орто үөрэх тэрилтэлэрэ устудьуоннарын хардарыта үөрэтэллэр. Быйыл бу бырагыраамаҕа, уопсайа, Саха сирин аҕыс орто анал үөрэҕэ кыттар.
Бүгүн Дьокуускайдааҕы индустриальнай педагогическай кэллиэс устудьуоннара Алданнааҕы политиэхиньиичэскэй тиэхиньикумҥа үөрэнэ бардылар диэн иһитиннэрэллэр.
Людмила ПОПОВА, edersaas.ru