Былаас уорганнара Саха сирин олохтоохторун санааларын социальнай ситимнэр нөҥүө билсэллэр
Саха сиринээҕи былаас уорганнара социальнай ситимнэргэ тахсар иһитиннэриилэри болҕомтоҕо туталлар, онон бу ситимнэр улахан оруоллаахтар. Биэдэмистибэлэр уонна муниципалитеттар күннэтэ Саха сирин олохтоохторун туох долгутарын кэтээн көрөн, тутатына дьаһал ылаллар, соц.ситимнэргэ быһаарыылары биэрэллэр. Биэдэмистибэлэр иһитиннэриилэри биэс ситимтэн ылаллар: ВКонтакте, Одноклассники, Twitter, Instagram и Facebook.
Саха сирин Нэһилиэнньэтин олоҕун-дьаһаҕын хааччыйыыга госкэмитиэккэ бэлиэтииллэринэн, сыл саҕаланыаҕыттан госкэмитиэт уонунан иһитиннэриилэри оҥордо. Нэһилиэнньэттэн киирэр этиилэр дьыл кэмиттэн тутулуктаахтар: кыһын – олорор дьиэлэргэ баһаардар, саас — халаан уута, сайын – ойуур уота, сылы эргиччи – быыһыыр үлэлэр.
“Маныаха сорох кыһалҕалары эрэ быһаарыы биэдэмистибэ көрүүтүгэр баар, холобур, ойуур баһаардарын Экология министиэристибэтэ сүрүннүүр. Ол эрээри дьон биһигиттэн ирдэстэҕинэ, биһиги кэмитиэккэ бас бэринэр тэрилтэлэртэн хоруйдары ылабыт эбэтэр атын министиэристибэлэри кытта сибээстэһэбит”, — диэн тустаах кэмитиэккэ быһаардылар.
Соц. ситимнэргэ бэйэтин сүрүн былаһааккатын быһыытынан госкэмитиэт Instagram-ы талла. Бүгүҥҥү туругунан, манна 150 пост тахсыбыт. Хоруйу 20 мүнүүтэ иһигэр бэлэмнииллэр, сороҕор атын биэдэмистибэҕэ ыыталлар.
Нерюнгри оройуонунааҕы дьаһалта уонна олохтоох нэһилиэнньэ ыкса сибээстээхтэр. Манна олохтоохтор интэриниэт-былаһааккаларга бэйэлэрин санааларын аһаҕастык этэллэр, ыйыталлар, былаас ылыммыт быһаарыыларын ырыталлар.
Үгэс курдук, кыһын хаары ыраастааһын, сайын – дьиэ таһынааҕы сири-уоту тупсаҕай оҥоруу уо.д.а. Оройуон дьаһалтатын исписэлиистэрэ сонуннары киэҥник тарҕатар ситимнэргэ “бөх-сыыс реформатын” туһунан быһааран биэрбиттэрэ, үҥсүүлэри операторга уонна салайар хампаанньаҕа ыыппыттара.
Бэйэлэрин тус страницаларыгар үҥсэргээн суруйааччыларга барыларыгар көмөлөһөр кыаллыбат, тоҕо диэтэххэ, сорох гражданнар аадырыстарын ыйбаттар, онон ханна уу арахсыбытын, уоту араарбыттарын быһаарар уустук.
Барыта үҥсүү эрэ буолбатах. Холобур, куорат олохтоохторо көһөрүү бырагырааматын кэлэр түһүмэҕэ хайдах үлэҕэ киириэхтээҕин эбэтэр киинэ тыйаатырыгар ханнык эрэ киинэни тоҕо аҕалбатахтарын туоһулаһаллар. Дьон күүтэр ыйытыыларыгар хайаан да хоруйдууллар.
Саха сирин Экологияҕа министиэристибэтигэр социальнай ситимнэр нөҥүө күннэтэ үгүс ыйытыы киирэр. Дьон үксүгэр айылҕа харыстабылыгар сыһыаннаах кэһиилэр тустарынан суруйаллар. Холобур, быйыл саас “Одноклассники” сайт нөҥүө Чокуурдаахха канализация уута-хаара сүүрэ сытарын туһунан иһитиннэрии киирбитэ. Олохтоох иниспиэктэрдэр тута бэрэбиэркэлээн, 980 тыһыынчаттан тахса солкуобайдаах ыстараап түспүтэ.
Министиэристибэлэр уонна биэдэмистибэлэр салайааччылара интэриниэти туһанааччылары кытта быһаччы сибээстэһэллэр. Саха сиригэр бастакынан онлайн коммуникациянан өрөспүүбүлүкэ баһылыга Айсен Николаев туһаныыны саҕалаабыта. Кини Дьокуускай куорат мээринэн үлэлии олорон, соц. ситимнэринэн көхтөөхтүк туһаммыта, ити куорат үгүс кыһалҕаларын быһаарарга төһүү буолбута. Аны билигин өрөспүүбүлүкэ таһымнаах кыһалҕалары тутатына быһаарарга көмөлөһөр.
Григорий Фоменко, СИА.