Учууталлар идэҕэ сатабылларын уонна Норуоттар икки ардыларынааҕы интеллектуальнай оонньуу кыттааччыларын билимҥэ настаабынньыктарын салгыы сайыннарар инниттэн Саха сиригэр “Ситиһии сирэ” үөрэх салонун тэрийдилэр.
Үөрэх суолталаах боппуруостарын, бырайыактыыр, чинчийэр итиэннэ үөрэнээччилэр талааннарын сатабылларын сайыннарар соруктаах тэрээһин С.Н.Донской аатынан СӨ үөрэҕи сайыннарар уонна идэ таһымын үрдэтэр институкка буола. Өрөспүүбүлүкэ, Арассыыйа уонна тас дойдулар бары педагог-кыттааччыларыгар актовай лиэксийэлэри аахтылар, маастар-кылаастары ыыттылар.
Түмүктүүр тэрээһининэн айдарыылаах оҕолору кытта үлэҕэ дойду уонна норуоттар икки ардыларынааҕы уопуту үллэстиигэ билим-мэтиэдикэ сэминээрэ тэрилиннэ. Ырытыһыы сүрүн тиэмэтинэн оскуола бырагырааматынан хааччахтаммакка, оҕону бары өттүнэн сайыннарыы буолла.
Сэминээргэ бэйэтин кэтээн көрүүтүн Дьокуускай куорат физикаҕа мэтэдиическэй холбоһук салайааччыта, “Профи-Учитель-2016” өрөспүүбүлүкэтээҕи дьыалабыай оонньууга 100 баалы ылбыт учууталлар учуталлара Эрнест Мярикянов.
“Физикаҕа эксээмэн уонна олимпиада түмүктэрин ырытан көрөн баран, биһиги оҕолору физикаҕа 5-с кыалаастан үөрэтэрбит ирдэнэр эбит диэн түмүккэ кэллибит. Үөрэнээччилэр, саатар, биир сыл уһуннук бэлэмнэнэллэрэ буоллар түмүкпүт букатын тупсуо этэ. Ол эрээри, ордук көдьүүстээх буоларын туһугар оҕолору көҕүлүүрү учуоттуур эмиэ наада. Билигин оҕолор номнуо идэни талар кэмнэригэр 9-с кылаастан эрэ өйдөөн-төйдөөн дьарыктаналлар”, — диэн педагог бэлиэтиир.
Сэминээр тэйиччиттэн көрүҥүнэн эмиэ барда. Педагогтар маастарыстыбаларын кииниттэн (Москва к.) тэйиччиттэн кыттааччы Дмитрий Зарубин ыйарынан, оҕолору хамаандаҕа үлэлииргэ үөрэтиэхтээхпит. “Үөрэнээччи билиитин хайаан даҕаны олимпиаданан бэрэбиэркэлиир ирдэммэт, оҕо тулалыыр өттүн көрөр, ырытар буолуохтаах. Олох араас өрүттээҕин, чопчу биир эрэ хайысханы хаһыспат ордук. Оҕолор олимпиадаҕа хамаанданан үлэлииргэ сатабыллара уонна олоххо кэтээн көрүүлэрэ сайдыахтаах”, — диир кини.
Сэминээргэ “Wardaya College”(Индонезия) төрүттээчитэ, дуоктар Антон Вардайа, уйулҕа билимин хандьыдаата, Москватааҕы судаарыстыбаннай университет гимназиятын педагог-психолога Алиса Жилинская, Казаннааҕы федеральнай университет АйТи лиссиэйин анал үөрэтэр-научнай киинин химияҕа учуутала Екатерина Массарова, Ураллааҕы федеральнай университет анал үөрэтэр-научнай кииниттэн Александр Шендрик, Губернскай лиссиэйтэн (Пенза к.) Роман Зайцев, о.д.а. кытыннылар.
Норуоттар икки ардыларынааҕы интеллектуальнай оонньуу пресс-киинэ.