Ситэриилээх былаас отчуотуттан
Олох-дьаһах

Ситэриилээх былаас отчуотуттан

Бүгүн, олунньу 1 күнүгэр, «Саха» НКИХ ханаалыгар 11.00 чаастан СӨ бырабыыталыстыбатын 2019 сыллааҕы үлэтин отчуоттаата.

edersaas.ru
Быһа эпииргэ саамай элбэх боппуруос Дьокуускай куораттан, Мэҥэ Хаҥалас уонна Сунтаар улуустарыттан киирдилэр. Хотугу улуустартан – Усуйаана, Булун, Аллайыаха уонна Халыма оройуоннара элбэҕи ыйыттылар.

Дьокуускай куораттан көрөөччү суоппар быраабын ыларга хамыыһыйаны барарга уочаракка турбакка, он-лайн төлөөһүн туһунан ыйытта.
Владимир Солодов бу боппуруоска доруобуйа харыстабылын өттүгэр 2020 сылга сотору кэминэн биир кэлим портал үлэлиэҕэ диэтэ. “Ол аата бары боппуруостары биир сиргэ быһаарар кыахтаныахпыт. Доруобуйаҕа сыһыаннаах тэрилтэлэр бары бу порталга баар буолуохтара. Араас өҥө иһин он-лайн төлөбүрү эмиэ манна киллэриэхпит. Суудаарыстыбаннай өҥөлөр бары электроннай көрүҥҥэ көһөрүллүөхтэрэ. Онон, маннык уларыйыылар үлэҕэ киирэллэрин кэтээн көрүҥ”, — диэн эттэ.

Уус Алдан Сыырдааҕар саҥа кулууп дьиэтэ үлэҕэ киирбитинэн сибээстээн нэһилиэк олохтоохторо киинэ көрүөххэ сөп дуо диэн ыйытыыларыгар маннык хоруй буолла:
— Саҥа аһыллыбыт култуура кииннэригэр, кулууптарга дьоҥҥо киинэ көрдөрөр курдук тэриниэххэ наада. Хас биирдии дэриэбинэ олохтоохторо саҥа киинэлэри, ордук биһиги дьоммут бэйэлэрэ оҥорон таһаарбыт киинэлэрин көрөллөрүн туһугар элбэх үлэ ыытыллар. Ол иһигэр сөптөөх тиэхиньикэнэн хааччыйыы уонна киинэ ааптардарыттан көҥүлү, лицензияны ылыыны тэринии. Бу 2020 сылга өрөспүүбүлүкэ улахан аҥарыгар маннык үлэлэр ыытыллыахтаахтар, былааҥҥа киллэриллиэхтээхтэр. Саха киинэтэ сайдан аан дойдуга барытыгар билиннэ, аны ол киинэлэри өрөспүүбүлүкэ бары олохтоохторо көрөр кыахтаналларын туһугар кыһаллыахтаахпыт.

Мэҥэ Хаҥалас улууһуттан ыйытыы. «Симиир» диэн тутуу тэрилтэтигэр дьиэни өлүүлэһэн тутуу кыттыылаахтара албыннаппыттара. Кинилэртэн биир эрэ дьиэ дьоно кэмпэнсээссийэ ылбыттар. Өссө икки дьиэ дьонун туһунан умнан эрэллэр, кинилэр боппуруостара хаһан быһаарыллар диэн ыйытыыга: 
«Биһиги өрөспүүбүлүкэбит албыннаппыт дьону көмүскүүр саҥа федеральнай бырагыраамаҕа бастакынан киирбитэ. Федеральнай киинтэн бу боппуруоһу быһаарарга 660 мөлүйүөн солкуобай уонна өрөспүүбүлүкэ онно эбии харчы биэрэн, уопсайа 717 мөлүйүөн көрүллүбүтэ. Бастакы уочарат кэмпэнсээссийэ “Симиир” тэрилтэттэн албынаппыт 3 дьиэ дьонугар бэриллиэ уонна биир дьиэ “Монолитстрой” хампаанньа киэнэ. Харчыны 253 албыннаппыт киһиттэн 99-һа номнуо ыллылар. Бу сылга бары кэмпэнсээссийэни ылыахтара»,- диэтэ СӨ бырабыыталыстыбатын бэрэссэдээтэлин солбуйааччы Кирилл Бычков .

Кыһыл-Сыыр олохтооҕо хаһан биһиги бөһүөлэкпит сайдарый, туох уларытыы буолар диэн ыйытыытыгар Владимир Солодов сотору кэминэн суол-иис оҥоруута былааннанар, доруобуйаны тупсарынарга аналлаах боппуруостары быһаарыахпыт диэн эппиэттээтэ. «Канализацияны ыраастыыр тутуу уонна гааһынан сапараапкалыыр ыстаансыйа тутуллуохтара. Онон Кыһыл-Сыыр сайдарыгар элбэх былаан баар», — диэтэ.

Дьокуускай куораттан маннык боппуруос киирдэ: “Култуура уонна искусство федеральнай үөрэх кыһаларыгар киирэргэ үөрэххэ ылар хамыыһыйа манна кэлэн айар дьоҕуру көрүү эксээмэнин тутуо да?” диэн. Онуоха бу хайысхаҕа Щепкин аатынан Үрдүкү театральнай училище (институт) үчүгэйдик үлэлэһэрин бэлиэтээн аастылар. Нуучча драматическай тыйаатыра Щукин аатынан училищеҕа үөрэххэ киириэн баҕалаах оҕолорго босхо бэлэмнэнии дьарыктарын ыытан бэйэлэригэр артыыс быһыытынан төннөн кэлэллэригэр кыһанар. Инникитин бу маннык бииргэ үлэлээһин элбэх үөрэх кыһаларын кытта ыыттыллыа диэн эттилэр.

Элбэх киһи ыарахан ыарыһахтары эминэн хааччыйыы туһунан ыйытыыларыгар доруобуйа харыстабылын миниистирэ Елена Борисова бу сылга 2 миллиард солкуобайтан тахса үп көрүллүннэ диэтэ. Сылтан сыл аайы эминэн хааччыйыыга бэриллэр харчы кээмэйэ эбиллэрин туһунан этэн ааста. Бары ыарыһахтарга эмптэрэ кэмигэр тиийиэхтээҕин туһунан уонна биһиги эрэгийиэммит эмп өттүнэн толору хааччылыылаах диэн эттэ.

Покровскайтан «Азия оҕолоро» норуоттар икки ардыларынааҕы спортивнай оонньууларын туһунан ыйыттылар. СӨ спорка уонна физическэй култуураҕа миниистирэ Иннокентий Григорьев бу 2020 сыллааҕы оонньуулар Монголияҕа ыытыллыбат буоллулар диэтэ. Олунньу 15 күнүгэр мунньах кэнниттэн ханна, хаһан буолара, ханнык спорт көрүҥнэрэ киирэллэрэ чопчу быһаарылларын туһунан эттэ.

Мииринэй оройуонуттан Айхаллааҕы 8-с нүөмэрдээх фабрика сабыллан оробуочайдар үлэлэрэ суох хаалбыттарын иһитиннэрдилэр. СӨ бырабыыталыстыбатын бэрэссэдээтэлин бастакы солбуйааччы Алексей Колодезников: «222 ууратыллыбыт оробуочайдартан 120 киһи атын үлэҕэ ылылыннылар. Үлэ була илик дьоҥҥо 4 ыйдаах орто хамнас төлөнүөҕэ», — диэн эппиэттээтэ. Владимир Солодов СӨ Нэһилиэнньэ дьарыктаах буолуутугар судаарыстыбаннай кэмитиэтигэр бу боппуруоһу хонтуруолга ылалларыгар уонна Айхалга туспа офис арыйан дьону үлэнэн хааччыйарга эттэ.

Онтон да атын элбэх ыйыытыы киирдэ. Ситэриилээх былаас отчуотун тэрийээччилэр быһа эпииргэ киирбит хас биирдии боппуруоска эппиэт бэриллиэ диэн эттилэр.

edersaas.ru

1
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

16 + один =