Сирияттан икки оҕону дойдуларыгар Саха сиригэр аҕаллылар

Ааптар: 
Бөлөххө киир:

Саха Өрөспүүбүлүкэтигэр Оҕо быраабын боломуочунайын аппаратын көмөтүнэн Сирияттан төрөөбүт дойдуларыгар Саха сиригэр төрөппүттэрэ байыаннай дьайыы зонатыгар суорума суолламмыт Арассыыйа икки оҕотун аҕаллылар.

Ближнэй Востокка байыаннай күөнтэһии ыытыллар зонатыттан саастарын ситэ илик Арассыыйа гражданнарын төрөөбүт дойдуларыгар төнүннэрии уонна бу оҕолор баар сирдэрин булуу үлэтэ көхтөөхтүк Арассыыйа Федерациятын Бэрэсидьиэнин Владимир Путин сорудаҕынан 2018 сыл сэтинньи ыйыттан  Арассыыйа Бэрэсидьиэнин иһинэн оҕо быраабын боломуочунайынан сүрүннэнэр.

Икки бырааттыылар Арассыыйа тас өттүгэр күн сирин көрбүттэрэ уонна кинилэри Арассыыйа биригээдэтин исписэлиистэрэ Сирия сиригэр-уотугар “Аль-Холь” лааҕырыгар булбут кэмнэригэр кинилэр баара-суоҕа 1 уонна 3 саастаахтара.

2019 сыл ахсынньытыгар ылыллыбыт молекулярнай-генетическэй чинчийии уолаттар Саха сиригэр олорор эбээлэрин кытта хаан уруу буолаллара биллэн, кинилэргэ төрөөбүттэрин туһунан сибидиэтэлистибэ уонна загранпааспар толоруллубута.

Бу кэм устата оҕолор “Аль-Холь” лааҕыртан “Джераблус” оҕо приютугар көһөрүллэннэр, кинилэри көрдөөһүн эбии бириэмэни эрэйбитэ. 2022 сыл муус устар ыйыттан Турцияҕа баар Арассыыйа дипломаттарын кытта бииргэ эрэгийиэннээҕи уонна федеральнай биэдэмистибэлэри кытта сүҥкэн  үлэ  ирдэнэр докумуоннары  уонна Сирияттан Арассыыйаҕа оҕолору биэриигэ сөбүлэһиилэри бэлэмнээһиҥҥэ ыытыллыбыта.

Саха сирин Ил Дархана Айсен Николаев тус сорудаҕынан дьиэ кэргэни Москваҕа арыаллааһын уонна Москва-Дьокуускай хайысхатынан арыаллааһын тэрилиннэ. Өрөспүүбүлүкэ баһылыга маны сэргэ дойдуларыгар кэлбит оҕолорго  социальнай, уйулҕа , мэдиссиинэ көмөтүн уонна чөлүгэр түһэриини оҥороллоругар сорудахтаата.

2022 сыл от ыйын 8 күнүгэр Турцияҕа бу кырачаан оҕолору эбээлэригэр туттарбыттара уонна бу күн кинилэр бары бииргэ Арассыыйаҕа көппүттэрэ.

Бүгүн, от ыйын 11 күнүгэр, Саха Өрөспүүбүлүкэтигэр Оҕо быраабыгар боломуочунайа Туйаара Васильева оҕолору уонна эбээлэрин Дьокуускай аэропуордугар көрүстэ.

“Мин Саха Өрөспүүбүлүкэтин Ил Дархана Айсен Сергеевич Николаевка сиэннэрим дьылҕаларыгар кыттыытын уонна дойдуларыгар кэлиилэрин тэрийбитин иһин махтанабын. Ону тэҥэ истиҥ махталбын Саха Өрөспүүбүлүкэтигэр Оҕо быраабыгар боломуочунайа Туйаара Валерьевна Васильеваҕа тиэрдэбин.  Мин киниттэн бу сыл муус устар ыйыгар сиэннэрбин төнүннэриигэ көмөлөһөрүгэр көрдөспүтүм уонна кини сиэннэрбин эпиэкэҕэ ылыыбар түргэнник докумуоннары толорууга, ону тэҥэ Турция Өрөспүүбүлүкэтин консульствотыгар докумуоннары толорорбор көмөлөстө, ону тэҥэ Арассыыйа дипломаттарын кытта Сирияттан Арассыыйаҕа оҕолору биэрии хаамыытыгар сибээһи тутта. Сиэннэрим туруктара үчүгэй, тапталлаах дьиэ кэргэттэрин ортотугар кэллилэр”, — диэн эбээлэрэ махталын биллэрдэ.

“Оҕолору төрөөбүт дойдуларыгар сэбилэниилээх күөнтэһии бара турар зонатыттан төнүннэрии – бу үгүс исписэлиистэр ымпыктаах-чымпыктаах үлэлэрин түмүгүнэн уонна барыбытыгар үөрүүлээх түгэнинэн буолар. Кырачааннары кэтэспит аймахтарыгар уонна чугас дьонугар эмиэ дьоллоох түгэн. Бу оҕолор хайдахтаах балаһыанньаҕа киирэн тахсыбыттарын этэргэ уустук. Оттон билигин барыта этэҥҥэ түмүктэннэ, кырачааннар кинилэри таптыыр эбээлэригэр, аймах-билэ дьонугар төнүннүлэр. Аны оҕолору эмтиэххэ уонна кинилэр доруобуйаларын чөлүгэр түһэриэххэ наада – бу боппуруоһу биһиги болҕомтоҕо ыллыбыт”, — диэтэ Туйаара Васильева.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата

СИА хаартыската

Бэлэмнээтэ Женни Стрюкова

+1
0
+1
0
+1
0
+1
0
+1
0
+1
0
+1
0