„Сири оҥоруу бырагыраамата наада!“ — диир Сатаҕай бааһынайа Василий Никитин

Амма улууһун Сатаҕай нэһилиэгин олохтоохторо, уон оҕолоох Февронья, Андрей Никитиннэр 1992 с. «Чараҥнаах» бааһынай хаһаайыстыбаны тэриммиттэрэ.

edersaas.ru

Ол хаһаайыстыбаны 1994 сылтан уоллара, алта оҕолоох ыал аҕата, СӨ тыатын хаһаайыстыбатын туйгуна, СӨ үтүөлээх фермерэ Василий Никитин эрэллээх илиитигэр ылан, үйэ чиэппэриттэн ордук салайан кэллэ.

«Чараҥнаах» сүөһүтүн ахсаанын элбэтэн, өрөспүүбүлүкэҕэ биир бастыҥ үлэлээх хаһаайыстыба буола үүннэ. Түөрт сыллааҕыта «Бааһынай хаһаайыстыба базатыгар дьиэ кэргэн пиэрмэтин тутуу» федеральнай бырагырааманан саҥа хотон туттубута. Быйыл 100 сүөһүнү, ол иһигэр 50-тан тахса ыанар ынаҕы кыстатта. Ааспыт сылга барыта 81 т үүтү, 10 т эти туттаран, былаанын толорбута. Быйыл да ити кирбииттэн түспэт соруктаах.

Билигин ынахтар төрөөннөр үлэ лаппа элбээбит. Саҥа дьылга диэри сиэппит отторун хаачыстыбата мөлтөх буолан, ньирэйдэргэ охсуулаах буолбут. Ол эрээри, бэтэринээрдэр көмөлөрүнэн эмтээн, битэмиин сиэтэн, билигин туруктара үчүгэй. Хаһаайыстыба тутаах үлэһиттэринэн Василий кэргэнэ, буҕаалтыр Елена Сидоровна, тырахтарыыстар Степан Никитин, Евгений Лукин, ыанньыксыттар Василий Бурнашев уонна Марина Сосина буолаллар.

– Тыа сиригэр сүөһү көрөр, сылгы да иитэр ороскуоттаах үлэ буолар, – диир Василий Андреевич. – Дьон үүт туттаран эрэ дохуоттанан олороллор. Ити эрээри үүт харчыта кырата охсуулаах, хамнас кэмиттэн кэмигэр төлөнөн иһиэхтээҕэ кыаллыбат. Хамнас хойутууруттан үлэ бытаарар, харчы эргиирэ харгыстанан ороскуот өссө улаатар. Улахан хаһаайыстыбалар атын субсидиялара элбэх, онон чааһынайдары кытта, биллэн турар, тэҥнэспэттэр. Субсидия биир өттүнэн дьону буортулуур, босхо харчы дьон үлэни сыаналаабат буоларыгар тириэрдэр. Кэнники сылларга бааһынайдарга анаммыт бырагыраамаларга киирэн, үлэлиэн баҕалаах дьон база тэриммиттэрэ, механизированнай хотон туттубуттара, тиэхиньикэ ылыммыттара үчүгэй.

Ходуһата тиийбэт буолан, «Чараҥнаах» сыллата ыаллыы нэһилиэктэртэн сир түүлэһэн оттуур итиэннэ эбии от атыылаһан сүөһүлэрин кыстатар. Ол иһин, Василий Никитин сири оҥорууга туһуламмыт бырагыраама баар буоларыгар баҕарар. «Сири оҥордоххо эрэ, от өлгөмнүк үүнүөҕэ, ол түмүгэр бородууксуйа баар буола туруо», – диир кини.

«Саха сирэ»хаһыакка, edersaas.ru саайтка анаан

Алтаана Артемьева.