Сиргэ сылдьар аанньалбыт

Ааптар: 
Бөлөххө киир:

Бүгүн мэдиссиинэ үлэһитин күнэ!
Бу үрдүк эппиэтинэстээх үлэһиттэри уруйдуур, махтал тылын этэр күммүт.

Дьон доруобуйатын туһугар күнүстэри-түүннэри үлэлиир дьоҥҥо эрэйи чэпчэтэр эҕэрдэбин, махталбын, саҥа хоһооммун аныыбын! Дьоллоох, доруобай буолуҥ!

БЫРААС — ААННЬАЛ

Быраас киһи үлэтэ
Бырааһынньык буолбатах,
Өрүү ыалдьар киһилиин
Арыаллаһар, алтыһар.

Эмтээн эрэл үөскэтии,
Тылы булан уоскутуу,
Ыалдьар киһи туругар
Кыһалҕатын чэпчэтии.

Ынчык, ытыыр истэртэн
Дууһа, турук тупсубат,
Быраас тимир буолбатах
Тэбэр уйан сүрэхтээх.

Ыарыһахтыын тэҥинэн
Олох иһин охсуһар,
Ыксал тириир кэмигэр
Утуйарын да умнар.

Орто сирбит олоҕун
Бэлэхтииллэр үөһэттэн,
Өлө сыһар түгэҥҥэ
Быраас биэрэр иккиһи.

Сиргэ сылдьар аанньалбыт
Билэр олох сыанатын,
Хайдах курдук сыранан
Салгыыр кини олоҕу!

                                                                Полина-Победа,
                                                                            Уус-Алдан.

Хаартыска: ru.depositphotos.com ылылынна

+1
0
+1
0
+1
0
+1
0
+1
0
+1
0
+1
0