“Уһук Илиҥҥи гектар” туһунан сокуон үһүс түһүмэҕэ олоххо киириитинэн, Амур уонна Сахалин уобаластарын, Еврей автономнай уобалаһын, Хабаровскай кыраай соҕурууҥҥу өртүн, Приморье кытылынааҕы сирдэрэ ордук былдьаһык буолуохтарын экспертэр сабаҕалыыллар.
Роман Попов, “Саха сирэ” хаһыат, https://edersaas.ru
Сарсыҥҥыттан “Уһук Илиҥҥи гектар” сокуонун үһүс түһүмэҕэ саҕаланар. Онно олоҕуран Арассыыйа гражданина Уһук Илиҥҥи уокурук хайа баҕарар субъегар биир гектар иэннээх сири босхо ылар бырааптанар.
Дьон биир гектардарын ылаары ордук хото Амур уонна
Сахалин уобаластарыгар, Еврей автономнай уобалаһыгар,
Хабаровскай кыраай соҕурууҥҥу өртүгэр,
Приморье кытылынааҕы сирдэргэ тардыһыаҕа диэн буолар.
Экспертэр этэллэринэн, бэйэлэрин былааннарын олоххо киллэрэр туһуттан ханнык да үлэттэн чаҕыйбат, араас мэһэйтэн толлубат, айар-тутар дьоҕурдарын, талааннарын арыйар кыаҕы көрдүүр дьон биир гектары ылыыга интэриэстээх буолуохтарын сөп.
Приморье дьаһалтатын пресс-сулууспата иһитиннэрбитинэн, олунньу 1 күнүттэн кыраайга сирдэниэн баҕалаахтартан сайабылыанньа халҕаһалыы анньан киириэҕин күүтэллэр. Манна ыйга ортотунан 21 тыһыынча, ол эбэтэр күҥҥэ ортотунан 990 сайаапканы көрөргө былааннаналлар. Билиҥҥитэ онно бэлэмнэнэн көрөр-истэр үлэһит ахсаанын эбэллэр, сотору кэминэн “босхо гектар” ылыан баҕалахтарга сүбэлиир, ыйан-кэрдэн биэрэр саҥа офис аһыллара күүтүллэр.
Дойду салалтата Уһук Илиҥҥэ дьон кэлэн олохсуйуутун көҕүлүүр инниттэн соҕурууттан кэлээччилэргэ араас чэпчэтиилэри олохтуур, көмө көрөр былааннаах. Чунуобунньуктар сокуон олоххо киириэҕиттэн Уһук Илин уокурук олохтоохторуттан биир гектары ылыыга 21 тыһыынчаттан тахса сайаапка киирбитин, манан регион кэтэх хаһаайыстыбатын биир бырыһыаныттан ордуга сиргэ үлэлиир баҕалааҕын биллэрдэ диэн этэллэр, онон бырайыак ситиһиилэхтик саҕаламмытын ыйаллар.
Уһук Илини сайыннарыыга министиэристибэ дааннайынан, бүгүҥҥү туругунан биир гектар сири ылыыга 21 723 сайабылыанньа киирбит, уопсайа 3,920,32 га иэннээх 4 195 учаастак бас билиигэ бэриллибит.
Санатар буоллахха, “Уһук Илиҥҥи гектар” туһунан сокуон
2016 сыл бэс ыйын 1 күнүттэн олоххо киллэриллэр.
Манна бастакынан сир ылар быраап “пилотнай” дэнэр оройуоннар олохтоохторугар бэриллибитэ.
Алтынньы 1-тан сокуон уокурук үрдүнэн дьайыыламмыта.
2017 сыл олунньу 1 күнүттэн Арассыыйа бары гражданнара Уһук Илиҥҥи уокурукка биир гектар иэннээх сири босхо ылар бырааптаннылар.
Роман Попов, “Саха сирэ” хаһыат, https://edersaas.ru