«Сир уустара» эргиччи туһалаах киин үлэтин саҕалаата

Киин Сунтаар улууһун Кэмпэндээйи сэлиэнньэтигэр Г.Е.Чолбодуков аатынан санаторий баазатыгар тэрилиннэ. Бастакы симиэнэҕэ нэһилиэк оскуолатын үөрэнээччилэрэ дьарыктаналлар. Кинилэр манна «Робототехника», «Саха сирин дьиктитэ», «Аныгы үҥкүү» уонна «Englishmate» бырагыраамаларынан үөрэнэллэр. Тохсунньуттан манна өрөспүүбүлүкэ атын улуустарыттан оҕолор кэлэннэр доруобуйаларын чэбдигирдиниэхтэрэ уонна үөрэниэхтэрэ диэн СӨ Үүнэр көлүөнэ пуондатын пресс-сулууспата иһитиннэрэр.

Киин үлэтэ саҕаламмытынан эҕэрдэлэрин өрөспүүбүлүкэ, Сунтаар улууһун уонна Кэмпэндээйи сэлиэнньэтин салалталара, ону сэргэ «Юные якутяне» киин бастайааннай партнердара онна доҕотторо тиэртилэр. Истиҥ эҕэрдэтин Үүнэр көлүөнэ тус сыаллаах пуондатын генеральнай дириэктэрэ Владимир Егоров тиэртэ. Кини пуонда саҥа кэнсиэпсийэтин олоххо киллэриигэ бииргэ көмөлөөн үлэлээһин улахан тирэх буолбутун бэлиэтээтэ.

«Оҕолор, ыччаттар өй-санаа, билии-көрүү кирилиэһин дабайалларыгар, физическэй кыахтаах буола сайдалларыгар биһиги болҕомтобутун уурабыт. «Сир уустара» — Саха сирин үөрэнээччилэрин сынньалаҥнарын туһалаахтык атааралларын тэрийэргэ, доруобуйаларын чэбдигирдинэллэригэр, научнай-чинчийэр үлэнэн дьарыктаналларыгар тирэх буолар. Маныаха Кэмпэндээйи айылҕатын ураты көстүүтэ, сирин-уотун сэдэх баайа үөрэтэргэ, билиини хаҥатарга баазанан буолуо. Ол иһин, киин манна тэриллэригэр кыһамньыбытын бары уурдубут. Оҕолор манна билиигитин-көрүүгүтүн хаҥатыныаххыт, саҥаны-сонуну билиэххит, элбэх эрэллээх доҕоттордонуоххут диэн эрэнэбин. Дуоһуйа сынньанаргытыгар, чинчийиилэргэ көхтөөхтүк кыттаргытыгар уонна  ылбыт билиигитин-көрүүгүтүн үөрэнэргитигэр көдьүүстээхтик туһанаргытыгар баҕарабын«, — диэтэ пуонда салайааччыта.

Бэлиэтээн эттэххэ, СӨ Үүнэр көлүөнэ пуонда өйөбүлүнэн,   «АЛРОСА» АХ (ПАУо) үбүлээһининэн, быйыл аныгы үйэ ирдэбилигэр эппиэттиир  «Сир уустара» үлэҕэ килэрилиннэ. Аныгыскы сылга 40 миэстэлээх куорпус былааннанар.

«Юные якутяне» киин дириэктэрэ Варвара Васильева бэлиэтээбитинэн, манна түөрт сүрүн хайысханан үөрэнэллэр. Ол курдук, естественнэй-научнай хайысха (мэдиссиинэ, тыа хаһаайыстыбата), политехническэй хайысха (технология уонна техноиндустрия), креативнай айымньы хайысхата (уус-уран айымньы, уус кыһата), туризм уонна кыраайы үөрэтэр хайысха (этно уонна экотуризм, социокультурнай сырдатыы).

Манна өссө смарт-бибилэтиэкэни арыйар, улахан сааланы үлэлэтэр уонна да атын аныгы үйэ ирдэбилигэр эппиэттиир үлэни-хамнаһы тэрийэр былааннаахтар.