Маны аах Тыа хаһаайыстыбата

Сир-уот тиийбэтэ — тыын кыһалҕа

Раиса Апросимова Амма улууһун Сатаҕай нэһилиэгин дьаһалтатыгар тыа хаһаайыстыбатын исписэлииһинэн 2007 сыллаахтан үлэлиир.

edersaas.ru

Атыннык эттэххэ, олохтоох дьаһалталарга тыа хаһаайыстыбатын исписэлииһин анал ыстаата көрүллүөҕүттэн анаммыт, улуус биир тарбахха баттанар уопуттаах исписэлииһэ буолар. Оттооһун туругун туһунан Раиса Афанасьевна маннык кэпсиир:

Биһиги нэһилиэкпит сирэ-уота бэрт кыараҕас буолан, ходуһа сирэ олус күндү. Сорох хаһаайыстыбаларбыт наар ыаллыы нэһилиэктэртэн сир түүлэһэн, бырыһыаҥҥа кэпсэтэн оттоон-мастаан сүөһүлэрин-сылгыларын ииттэн олороллор. Нэһилиэк үрдүнэн 1 тыһыынча 400 ынах сүөһүлээхпит, 1 тыһыынча 500 сылгылаахпыт. Саамай бөдөҥ хаһаайыстыбабыт, Тимофей Лукин аатынан кэпэрэтиип, 270 сүөһүлээх, ол иһигэр 125 ыанар ынахтаах итиэннэ 480 сылгылаах.

Барыта 1 тыһыынча 650 туоннаны оттоон, былааммыт 65,5 % толордубут. Ханна да буоларын курдук, кэтэх ыаллар бүтэннэр, бөдөҥ хаһаайыстыбалар оттууллар. Алта мобильнай биригээдэ тэриллибититтэн билигин үс биригээдэ хаалан үлэлиир. Семен Анисимов биригээдэтэ Нуотараҕа, Василий Никитин биригээдэтэ Покровкаҕа оттууллар, Еремей Артемьев биригээдэтэ Мэҥэ Хаҥалас улууһун Төхтүр нэһилиэгэр, өрүс арыытыгар, киирэн оттуу сылдьар. Лукин аатынан кэпэрэтиип 300 туонна оттоох, былаана 900 туонна этэ да, икки эрэ звенолаах уонна тиэхиньикэтэ моһуоктаан, бытааран хаалла, мантан күһүн ситиһиэ диэн эрэниэҕи баҕарыллар. Сүөһү эбии аһылыгар анаан, саас 130 гектар бааһынаҕа эбиэс ыспыта курааҥҥа оҕустарда да буоллар, 400 туоннаны сиилэстээтэ. Сенажка киирэ илик.

Отторо тиийбэт хаһаайыстыбалартан 200 туоннаҕа сайаапканы хомуйдубут, онтон аҥаарын Соморсунтан атыылаһарга дуогабардаспыппыт, ордугун Сэргэ Бэстэн ыларга кэпсэтэ сылдьабыт. Оччотугар сыл тахсарбытын син быһаара сыһар инибит…

Раиса Сибирякова, «Саха сирэ» хаһыат, edersaas.ru

0
0