Бүгүн Саха Өрөспүүбүлүкэтин күнүнэн, Тыа хаһайыстыбатын министиэристибэтин үлэһиттэрэ судаарыстыбаннай диэйэтэл, сир оҥоһуутун наркома Степан Аржаковка анаммыт стелаҕа тыыннаах сибэкки дьөрбөтүн уурдулар.
edersaas.ru
Үөрүүлээх дьаһалга кыттыыны ыллылар: миниистир Александр Атласов, Ил Түмэн дьокутаата Любовь Явловская, «Туймаада» агрохолдинг генеральнай дириэктэрэ Петр Ефремов, «Сир оҥоһуутун сулууспата» СБТ салайааччыта Афанасий Семенов уо.д.а.
— Степан Максимович Аржаков өрөспүүбүлүкэ судаарыстыбаннаһа төрүттэниитигэр сүҥкэн кылаатын киллэрбитэ. Кини салалтатынан Сир оҥоһуутун наркома тыа хаһаайыстыбатын норуот хаһаайыстыбатын биир сүрүн салаатын быһыытынан сайдар суолга киирбитэ – племенной үлэ, эти-үүтү былааннаахтык оҥоруу төрүттэрэ оҥоһуллубута.
Степан Максимович көҕүлээһининэн бастакы халбаһыы сыаҕа аһыллыбыта, ат сүүрдүүтэ тэрээһиннээхтик ыытыллар буолбута. Сири оҥоруу үлэтэ араас хайысханан тэриллэн, сиэмэнэн хааччыллыы боппуруоһа ситимнээхтик быһаарыллыбыта, МТС-тар тэриллибиттэрэ, ыһыы сирин иэнэ биллэрдик кэҥэтиллибитэ, каадыры кытары үлэ тиһигэ олохтоммута, – диэтэ Александр Атласов миитиҥҥэ.
Раиса Сибирякова, «Саха сирэ» хаһыат, edersaas.ru