Премьер-миниистир Владимир Солодов салайааччылаах СӨ Бырабыыталыстыбатын мунньаҕар, сэтинньи 19 күнүгэр, «Өрөспүүбүлүкэ муниципальнай тэриллиилэрин сирдэрин-уоттарын тупсаран оҥорууга чугастааҕы сир кыраныыссатын бэрээдэктиир» сокуон барылын өйөөтүлэр.
edersaas.ru
«Хас биирдии учаастак хаһаайына суох буоллаҕына, көрүүтэ-истиитэ суох буолар. Элбэх кыбартыыралаах дьиэҕэ олорор дьон иһинээҕи олбуордарын, оҕо былаһааккатын сирин докумуоннаппакка сылдьаллар. Ол иһин ити итэҕэһи туоратан, муниципальнай тэриллиилэргэ дьиэлэргэ, атын тутууларга сирдэрин учаастагын тэҥнээһин буолар. Ити сокуон киирдэҕинэ, улуустар кииннэригэр, куораттарга санитарнай турук тупсуо, бэрээдэк баар буолуо диэн эрэнэбит. Онон хас биирдии тутуу сирэ-уота хаһаайыннаах буолуохтаах, тиэргэни ыраастык тутарга, көҕөрдөргө, бөхтөн ыраастыырга ким эрэ эппиэтинэһи сүгүөхтээх», — диэн эттэ ОДьКХ уонна энергетика миниистирэ Дмитрий Садовников.
Элбэх кыбартыыралаах дьиэ аттынааҕы сирин кыраныыссата 2 м, оттон бырамыысыланнас эбийиэгэ 50 м тиийэ быһыллар. Сорох дьон бөхтөрүн тиэргэҥҥэ таһааран кутар, кирдээх ууларын тоҕор идэлээхтэр. Ону аҕыйатар сыалтан бу сокуон оҥоһулунна.
Марианна ТЫРТЫКОВА, «Саха сирэ» хаһыат, edersaas.ru