Сахабыт сирин экэниэмикэтэ сүнньүнэн сир баайын хостооһунунан сайдан кэллэ. Ол эрэн, бырамыысыланнас сайдыытын биир буортулаах өрүтэ: сирбитин-уоппутун дьөлө үүттээн, дэлби тэптэрэн, өрүстэрбитин киртитэн, тулалыыр эйгэҕэ оҥоһуллар хоромньу сыл ахсын улаатан иһэр. Онтон сылтаан, иһэр уубут, балык, хамсыыр харамай сүһүрэр, нэһилиэнньэ доруобуйата кэбириир.
edersaas.ru
Итинтэн сиэттэрэн, кэлэр сылларга экэниэмикэ атын салаатын сайыннарыыга улахан болҕомто уураллар. Ил Дархан Айсен Николаев өрөспүүбүлүкэ кэлэр алта сылга социальнай-экономическай сайдыытын былааныгар ити көрдөрүү сыл ахсын 10% үрдээн иһэрин ситиһэргэ сыал-сорук туруорбута. 2024 сылга диэри экэниэмикэ бу көрүҥүн ВРП (эрэгийиэннээҕи баалабай бородуукта) көрдөрүүтэ лаппа улаатыахтаах.
Бу хайысханы сайыннардахпытына, аан дойдуга алмаас, ньиэп, гаас сыанатыттан тутулуктанарбыт кыччыа этэ. Консалтинговай корпорация аналитиктара этэллэринэн, сиртэн хостонор баайга сыана түһүүтэ салҕанан бара турар. Ол биир охсуутунан ньиэп сыаната түһэн, дуоллар ыараан, солкуобай куурса биллэрдик мөлтөөтө. Оччотугар араас таһымнаах бүддьүөт туолуута да бытаарар кутталлаах.
Марианна Тыртыкова, «Саха сирэ», edersaas.ru