Сир баайын хостооччулар Саха сирин улуустарыгар 37 млрд тахса көмөнү оҥорбуттар
Ааспыт биэс сыл устата сир баайын хостооччулар Саха сирин улуустарыгар 37 млрд солк тахса көмөнү оҥорбуттар.
Бу туһунан СӨ Бырабыыталыстыбатын мунньаҕар бырамыысыланнас уонна геология миниистирин бастакы солбуйааччы Михаил Кириллин дакылааттаата. Кини этэринэн, бүгүҥҥү күҥҥэ итинник хабааннаах 40 сөбүлэһии баттаммыт. Былырыын сир баайын хостооччулар 5 млрд солк тахсаны оскуола араас тээбиринэ, медицинскэй оборудование ылылларыгар, хаарбах дьиэ-уот көтүрүллэригэр ыыппыттар.
Мунньаҕы иилээн-саҕалаан ыыппыт премьер Андрей Тарасенко тоһоҕолоон бэлиэтээбитинэн, сорох оройуоннар ити бырамыысыланнай тэрилтэлэри кытта сөптөөх үлэни ыыппатахтарын түмүгэр социальнай уонна экэнэмиичэскэй сайдыыга кыттыспаттар. Инньэ гынан, бырабыыталыстыба тустаах оройуоннары уонна тэрилтэри кытта ити боппуруостары атах тэпсэн олорон дьүүллэһиэҕэ.
Ааспыт биэс сылы ылан көрдөххө, баһаам үлэ барбыт. Холобура, «Роснефть» кыттыһан Өктөмҥө Оччугуй академия үөрэнэр уораҕайын туттарбыт, «Газпром» Дьокуускайга, Алдаҥҥа, Чульмаҥҥа спортивнай комплекстары тутар. «Полюс» тэрилтэ Алданнааҕы киин балыыһаҕа медоборудование ылан биэрбит. «Полиметалл» ХИФУ устудьуоннарыгар компьютердары уонна бырагыраамалары атыыласпыт. «Транснефть» Өлүөхүмэҕэ, Ленскэйгэ уоннна Алдаҥҥа суол өрөмүөнүгэр, уот тардылларыгар көмөлөспүт.
Ил Дархан Айсен Николаев ааспыт Уһук Илиҥҥи экэнэмиичэскэй пуорумҥа этнологическай экспертиза туһунан туспа сокуон федеральнай таһымҥа ылылларын ыйбыта.
«Саха сирэ» хаһыат