Бу күннэргэ өрөспүүбүлүкэ киин куоратыгар Хотугу сир аҕыйах ахсааннаах төрүт норуоттарын общиналарын III сийиэһэ буолан ааста.
Саха сиригэр Ийэ сыла биллэриллибитинэн, сийиэс дэлэгээттэрэ «Онкопоиск» бырагырааманан «кутталлаах» искэни эрдэ буларга уонна эмтииргэ аналлаах мэдиссиинискэй чинчийиигэ сырыттылар.
Онкология диспансерын исписэлиистэрэ Нерюнгри, Мииринэй, Булуҥ, Томпо, Алдан, улуустарыттан кэлбит 17 киһи доруобуйатын бэрэбиэркэлээтилэр уонна кэккэ процедуралары оҥордулар. Ол эбэтэр биохимическай анаалыска хаан ыллылар, УЗИ уонна КТ аппарааттарга көрдүлэр.
«Биһиги ыраах нэһилиэнньэлээх пууннарга олорорбутунан, маннык чинчийиилэргэ сылдьар кыахпыт суох. Тус бэйэм олус сөбүлээтим, маннык аахсыйалар элбэхтик ыытыллаллара буоллар. Биһиги хотугу сир аҕыйах ахсааннаах төрүт омуктарын бэрэстэбиитэллэрэ буоларбыт быһыытынан доруобуйабыт туруга, бастатан туран, тыйыс килиимэппитин кытта сибээстээх. Онон маннык көрдөрүнэрбит олус наадалаах. Бу сырыыга кэллим да, уочарата суох онкологка киирэн көрдөрүннүм, анаалыстары туттардым. Олус үчүгэй», -– диэн сийиэс дэлэгээтэ Степан Лебедев санаатын үллэһиннэ.
Эбэн эттэххэ, онкология өрөспүүбүлүкэтээҕи диспансера былааннаах үлэтин сөргүттэ уонна эмтэнээччилэри эрдэттэн суруйтарыынан көрөр (быраас анааһына суох). Диспансер исписэлиистэрэ үрдүк таһымнаах мэдиссиинискэй көмөнү оҥорорго бэлэмнэр.
Надежда ЕГОРОВА, «Саха сирэ», edersaas.ru