Сииттэтээҕи норуот айымньытын дьиэтэ бу уустук кэмҥэ үлэтин тохтоппокко, биир дойдулаахтарын сэргэхситэн, санааларын көтөҕөн, тэйиччиттэн араас тэрээһиннэри ыытар.
edersaas.ru, Аида Охлопкова
Ол курдук, Байанай ыйын уруйдаан-айхаллаан туран күүстээх аҥардарга “Баай Байанайбыт, көмүс хатырыкпыт тосхойдун” диэн ааттаах элбэх соболоох хаартыска күрэҕэ буолла.
«Биһиги дьоммут төрүт дьарыктара балыктааһын буоларын быһыытынан бу күрэх улахан болҕомтону ылла. Манна саамай элбэх соболоох хаартысканы Горохов Василий Александрович ыытан, дьон сэҥээриитин ылан кыайыылаах аатын сүктэ. Бу күрэхтэн кэрэ аҥардарбыт хаалсыбатылар, кинилэр кэргэннэрэ бултаан аҕалбыт минньигэс соболорун буһаран, кыраһыабайдык киэргэтэн остуолларын тупсардылар.
Кыайыылаахтары уонна кыттааччылары эҕэрдэлиибит! Баҕарабыт бэйэ төрүт аһын астына-дуоһуйа аһаан, доруобай буоларгытыгар», – диэн норуот айымньытын дьиэтин дириэктэрэ Марианна Сивцева кэпсиир.
Аида Охлопкова