Хаҥалас улууһугар Сиинэҕэ «Доруобуйа харыстабыла» национальнай бырайыак чэрчитинэн, саҥа модульнай амбулатория арылынна.
Хаҥалас улууһун баһылыга Олег Иринеев бу туһунан сырдатта диэн улуус дьаһалтатын пресс-кииниттэн иһитиннэрдилэр. «Чэбдигирии сылын аныгы үйэ ирдэбилигэр эппиэттиир амбулаторияны арыйыыттан саҕалаатыбыт. Тутуу былырыыҥҥыттан саҕаламмыта. Нэһилиэк олохтоох дьаһалтатын уонна ОДьКХ ГУТ Хаҥаластааҕы филиалын күүһүнэн акылаат бэлэмнэниллибитэ. Амбулатория саҥа тэрилинэн хааччылынна. Быраас, биэссэр, стоматолог хосторо, процедурнай, о.д.а. бааллар, — диэн кэпсээтэ.
Сиинэҕэ чугастааҕы нэһилиэктэртэн быһыы ыла, анаалыс туттара кэлэллэр. Онон бу тутуу тыа сирин олохтоохторугар улахан суолталаах диэн этэр.
Улуус баһылыга Кыһыл Үрүйэҕэ биэссэр-акушер пууна тутуллан бүтэн эрэрин, «Тыа сирин кэлимник сайыннарыы» федеральнай бырагырааманан Күөрдэмҥэ кыра балыыһа тутулла турарын сырдатта.
Амбулаторияны арыйыы үөрүүлээх тэрээһинигэр Хаҥалас улууһун баһылыгын социальнай боппуруостарга солбуйааччы Владислав Голоков, улуус киин балыыһатын кылаабынай бырааһа Ньургун Степанов, Сиинэ сэлиэнньэтин баһылыга Аркадий Шадрин, амбулатория сэбиэдиссэйэ Розалия Асекритова кытыннылар.
