«Сиэрдээх Арассыыйа» чилиэннэрэ быыбарга хандьыдааттары туруорар туһунан кэпсэттилэр
Бэҕэһээ, бэс ыйын 29 күнүгэр, «Сиэрдээх Арассыыйа» бэлитиичэскэй баартыйа эрэгийиэннээҕи кэмпириэнсийэтигэр, балаҕан ыйын 9 күнүгэр ыытыллар Ил Түмэн быыбарыгар хандьыдааттарынан олоххо уопуттаах дьону эрэ буолбакка, эдэрдэри таһаарар наадата этилиннэ.
Кэмпириэнсийэ кыттыылаахтара «Сиэрдээх Арассыыйа» бэлитиичэскэй баартыйа эрэгийиэннээҕи салаатын Сэбиэтин бэрэссэдээтэлэ, Судаарыстыбаннай Дуума дьокутаата Федот Тумусов оҥорбут отчуотун биһирииллэрин биллэрдилэр итиэннэ Федот Семеновиһы саҥа болдьоххо Сэбиэт бэрэссэдээтэлинэн хаттаан таллылар.
– Өрөспүүбүлүкэ үрдүнэн «Сиэрдээх Арассыыйа» баартыйа иккис сүрүн бэлитиичэскэй күүс буолар. Баартыйа араас эйгэ бэрэстэбиитэллэрин, ол иһигэр уопсастыбаннай үлэ актыбыыстарын итиэннэ норуодунай хамсааһын кыттыылаахтарын түмэр. Тыа сирин олохтоохторо биһигини өйүүллэр, онон, кэккэбитин хаҥатарга аны промышленнай улуустарга күүскэ үлэлиэхпитин наада. Ил Түмэн быыбара уустуктардаах буолара күүтүллэр, тирэҕин сүтэрэрин туһугар, биһиги баартыйабыт көлүөһэтигэр маһы угуохтарын сөп, – диэтэ Федот Тумусов итиэннэ Ил Дархан быыбарыгар бэйэтин кандидатуратын туруорумматын иһитиннэрдэ, күүһү ордук Судаарыстыбаннай Дуумаҕа уонна Ил Түмэҥҥэ дьокутааттанарга уурарга ыҥырда.
Дакылаакка баартыйа чилиэннэрин 80 % баартыйа хара тэриллиэҕиттэн сылдьар дьон буолаллара ыйылынна. Кырдьык, мунньахха араас улуустартан кэлбит дэлэгээттэри көрдөххө, үксүлэрэ сааһырбыт дьон эбит. Онон, болҕомто эдэрдэргэ итиэннэ олоххо көхтөөх позициялаах актыбыыстарга ууруллан эрэр эбит. Ол курдук, кэнники сылларга 25 саастаах устудьуон Мичил Николаев, «Сомоҕо күүс» уопсастыбаннай хамсааһын бэрэстэбиитэллэрэ Сулустаана Мыраан, Феликс Антонов, «Сир» экологическай хамсааһын салайааччыта Иван Степанов уо.д.а. баартыйаҕа киирбиттэр.
Санааны атастаһыы түмүгүнэн, Ил Түмэн быыбарыгар биир мандааттаах уокурукка уонна баартыйа испииһэгинэн барыта 120 киһини дьокутаакка хандьыдаатынан туруорарга быһаарыы ылылынна.
Раиса СИБИРЯКОВА, «Саха сирэ» edersaas.ru. сайт