«Сиэр-майгы кыһата» интэриниэт-контент. Сэргээҥ! Көрүҥ! Кыттыһыҥ!

Оҕоҕо да, улахан да киһиэхэ кэрэхсэбиллээх. Бүтүн дьиэ кэргэн сэргээн истэр кэпсээннэрэ, кырачааннарга бэртээхэй остуоруйалар, уһаныан баҕалаахтарга видеонан туһалаах үөрэх «Сиэр-майгы кыһата» интэриниэт-контеҥҥа киллэриллибиттэр.  Бу Тааттатааҕы норуот айымньытын дьиэтин кэлэктиибэ  арыйда. Сиһилии норуот айымньытын дьиэтин салайар Гаврил Вырдылин иһитиннэрэр.

—Атын кэм эбитэ буоллар,  баччаларга ханна да үлэ үөһүгэр түһүү буоллаҕа.  Сыл ахсын оннук тэтиминэн олорон кэлбит дьоҥҥо, ураты кэм тирээтэ. Коронавирус дьаҥа аан дойдуга үлэни-хамнаһы, барыыны-кэлиини, үөрэҕи-билиини  муннукка ыкта. Онуоха бу быыһык кэм тургутуутугар таах олорон биэриэ суохтаахпыт, сайдыы салҕаныахтаах. Ол иһин, дьоҥҥо-сэргэҕэ туһалаах буоллар ханнык диэн араас толкуйдар тобуллаллар.

Биһиги төрөөбүт тылбытыгар, төрүт дьарыкпытыгар болҕомтону улаатыннарар, туһалааҕы иҥэрэр сыаллаах, оҕолорбутугар, ыччаппытыгар, эдэр ыалларбытыгар анаан аныгы ирдэбилгэ эппиэттиир  «Сиэр-майгы кыһата» интэриниэт-контент арыйдыбыт.

Манна киирбит видеолар интэриниэт ситимигэр үйэ-саас тухары хаалаллар. Ону кэлин кэнчээри ыччат көрүөҕэ, сыаналыаҕа диэн эрэллээхпит. Маныаха, сэргээн кыттыһыан баҕалаахтарга, видеонан устуу хаачыстыбата үчүгэй, сырдыкка уһуллубут буолуохтаах диэн этэбит. Ону сэргэ, сахалыы ыраас саҥанан доҕуһуолланыахтаах. Чуолкайдык иһиллиэхтээх. 20 мүнүүтэттэн уһуо суохтаах.

Бу саҥа таһаарыыбытыгар «Бырдыка Уус кыын оҥорорго үөрэтэр» киллэрилиннэ. Көрүҥ, кыттыһыҥ, оҕолоргутун үөрэтиҥ. Мантан чахчы үөрэниэххит, элбэҕи билиэххит. Маны сэргэ, Николай Винокуров-Урсун «Бастакы көҕөн» кэпсээнин бүтүн дьиэ кэргэн истэригэр анаан ааҕабын.  Оттон кырачааннарга ини-бии Гриммнэр  «Күөс хааһы» остуоруйаларын Тааттатааҕы норуот айымньытын дьиэтин киинин «Эйгэ» диэн киинэ саалатын сэбиэдиссэйэ , СӨ култууратын туйгуна Николай Ануфриев киһи сэргээн, умсугуйан иһиттэр-истиэх ааҕар. «Кыһыл көмүс сымыыт» диэн нуучча норуотун остуоруйатын  улуустааҕы «Кустук»  оҕо образцовай драматическай тыйаатырын салайар Татьяна Захарова ааҕарын иһиттэххитинэ, остуоруйаҕа киирэн хаалбыт курдук сананыаххыт. Итини сэргэ, «Эриэппэ « остуоруйаны эһиэхэ Былатыан Ойуунускай аатынан Таатта  норуодунай тыйаатырын режиссера, СӨ култууратын туйгуна Валентина Бурнашева кэпсиирин, астынан, үөрэн, салгыбакка күн да ахсын истиэххит.  Кырачааннар тэҥҥэ кэпсииргэ, оруолларынан куоластарын уларытарга, өссө остуоруйаны көрөн олорон уруһуйдуурга үөрэнэллэрэ саарбахтаммат.

Сэргээбиттэр, сэҥээрбиттэр Тааттатааҕы норуот айымньытын дьиэтин youtube ханаалыгар көрүөххүтүн, инстаграм страницатыгар киириэххитин сөп. Оттон видеоматырыйааллары +79142272175 эбэтэр taatta_kultura@mail.ru ыытыҥ. Күүтэбит. Сэргээҥ! Кыттыһыҥ!