Бэҕэһээ Дьокуускай куоракка «Сэргэлээх уоттара» култуура киинигэр Виктор Иванов-Сиэйэ Уолун кэнсиэрэ буолла.
Сиэйэ Уолун «Чох хара харахтарыҥ» саҥа килиибэ хайдах уһуллубутун туһунан режиссерунан үлэлээбит Сунтаар улууһун култуура управлениетын салайааччыта Мария Кобельянова кэпсээтэ:
— Арай төлөпүөммүн көрбүтүм Биитиккэ (Сиэйэ Уола) хаста да эрийбит. Бу уол туохха олус элбэхтэ эрийбитэй диэн санаанан төттөрү эрийбитим, айар киэһэлээн эрэбин, Сунтаарга тиийэн бу ырыаҕа килиип устуохпун баҕарабын, ылсыый диэбитигэр «сөп» диэн тылынан бигэргэттим. Аны ыарыыбыт элбээтэ, кэлэр-барар баҕана үүтэ буолбутунан кыайан кэлбэтэ. Онтон сотору буолан баран эрийэн килииби хайыыбын куоракка уһултарабыт дуу, эһиги ылсаҕыт дуу, билиҥҥи үйэҕэ ырыаһыт көстүбэккэ да килииби оҥороллор дии диэтэ. Онуоха мин Сунтаарга «Дьиэ кэргэн» сылыгар бу ырыа киинэ буолан сүрэхтэнэрэ улахан бэлэх буолуо диэн санааттан, төһө да бириэмэ ыгымын иһин Славабар санаабын этэммин, өрөбүлү өрөбүл диэбэккэ, Сунтаарынан Дьокуускайынан устуохпут диэн былааннанан саҕалаабыппыт. Аны уһуллар дьону — Жанналаах, Максимы буларга @nadezhdasedalishcheva көмө буолбута. Уруу малааһын хайаан да көстүөхтээх диэн @radomir_sergeev устубут, бэйэм түсчүттээбит ыалбын Надежда, Владимир Неустроевтары ситимнээн биэрдибит. Аны холобурга сылдьар, элбэх оҕолоох ыалга сөбүлэһэн баран, кэккэ кыһалҕанан аккаастанан кэбиспиттэригэр ыксаан, ийэбинээн сүбэлэһэн бырааппын Костяны өйдүү биэрэн эрийбитим ылбатаҕар улахан убайыгар Ильяҕа кытта эрийэ сылдьыбытым. Онтум Костям сөп диэбитэ. Кэргэнэ Ньургуйаана кырдьык чох хара харахтаах кэрэ кыыс… Аны саастаахтарга төрөөбүт дойдубар Элгээйигэ баар ыаллары торумнаабытым ыалдьан хаалан аккаастаабыттарыгар куораты эмиэ көрдөрүөххэ диэн, эмиэ ийэм сүбэтинэн эдьийим Вика @viktoriia.uarova уонна чох хара харахтаах күтүөтүм Толя харахпар көһүннэ. Эдьийбэр эрийэн эппиппэр дэлби күлэн баран сөбүлэспитэ. Бүгүҥҥүттэн иккиэн утары көрсөн тапталгытын күөдьүтэ сылдьыҥ диэммин өссө дьээбэлээн дэлби күллэрдим быһылааҕа… Аны Биитиккэни хайаан да киллэрэбит диэн, чугастыы Хатаска тахсан хаар күрдьэрин, кэргэнин Линаны көрөрүн устубуппут. Манан диэн эттэххэ, ити дьиҥ кини миэхэ бу ырыаны бастаан хайдах ылыммытын кэпсээбитигэр өйбөр ойуулаабыт хартыынам… Аны ырыа бүтэһигэр «Үрдэл» пааркаҕа устуубут астык…
ЫСПЫРААПКА
Сиэйэ Уола «Чох хара. харахтарыҥ» Василий Полятинскай хоһооно, Олимпиада Спиридонова көҥүл тылбааһа, Гаврил Пахомов матыыба. Режиссер: Мария Кобельянова Тускулаана. Оператор, монтажер: Вячеслав Борисов. Килиибкэ Радомир Сергеев Надежда, Владимир Неустроевтар
уруу малааһыннарын устуута туһанылынна. Килиипкэ уһулуннулар: Акулина Иванова, Жанна Тихонова, Максим Аммосов, Ньургуйаана, Константин, Георгий, Виктор, Каролина Семеновтар, Виктория, Анатолий Уаровтар, сиэннэрэ Сарыал уонна Тускул.
edersaas.ru