Сиэйэ оскуолата 125 сылын бэлиэтээтэ

Бөлөххө киир:

Ааспыт ый бүтүүтэ Сунтаар Сиэйэтигэр улуус кырдьаҕас оскуолаларыттан биирдэстэрэ төрүттэммитэ 125 сыллаах үбүлүөйэ сүрдээх өрө көтөҕүллүүлээхтик, үөрүүлээх быһыыга-майгыга буолан ааста.

Зинаида Игнатьева, «Эдэр саас» сайтка анаан.


Үбүлүөй күнүгэр бөһүөлэк иһэ оргуйан олордо. Сарсыардаттан оскуолаҕа кэлбит ыалдьыттары регистрациялааһын ыытыллан, барыта 350-тан тахса араас кэмҥэ оскуоланы бүтэрбит, үлэлии сылдьыбыт ыалдьыттар ыраахтан-чугастан кэлбиттэрэ билиннэ. Олор истэригэр Дьокуускай куораттан тыһыынча кэриҥэ килэмиэтири айаннаан төрөөбүт оскуолаларын, учууталларын, бииргэ үөрэммиттэрин эҕэрдэлии кэлбиттэр да элбэхтэр.

Бу кэнниттэн оскуола спортивнай саалатыгар выпускниктар параадтара буолла. Бастакынан Сиэйэ орто оскуолатын 1957 сыллаахха бүтэрбит 11 үөрэнээччиттэн, 4 выпускник кэлэн параады аста. Салгыы араас сылларга бүтэрбиттэр кылааһынан киирэн истилэр. Оскуола пионерскай знамята горнист уонна барабаанньыт аргыстаах киирэн бочуоттаах миэстэҕэ ааһыар диэри көхтөөх ытыс тыаһа арыаллаата. Мустубут дьону дириэктэр Владимир Уаров, бастакы выпускниктар, кырдьаҕас учууталлар эҕэрдэлээтилэр.

Кэлбит ыалдьыттар салгыы кылаастарынан тарҕаһан, араас уруоктарга сылдьан, үөрэнэн, оҕо саастарыгар түһэн ыллылар. Кылаастарга, көрүдүөргэ выпускниктар “Үлэбитин төрөөбүт оскуолабытыгар аныыбыт” диэн ааттаах быыстапкалара тэриллибит. Манна ким туохха дьоҕурдааҕынан: уруһуйдарын, иистэрин, мастан оҥоһуктарын арааһын түмпүттэрэ, кинигэлэри аҕалбыттара болҕомтону олус тарта.

Күнүс олохтоох кулуупка үбүлүөй үөрүүлээх чааһыгар оскуола дириэктэринэн үлэлии сылдьыбыт 94 саастаах В.Е. Александров, 88 саастаах кырдьаҕас учуутал П.Ф. Александров кыттаннар, мустубут дьон сүргэлэрин көтөхтүлэр. Оскуола историятын, билиҥҥитин туһунан дириэктэр В.В.Уаров сиһилии кэпсээтэ. Ол курдук, араас сылларга Н.М.Анисимов, М.Н. Петров, И.В.Гурьев, П.Г. Павлова курдук биллэр-көстөр, ытыктанар учууталлар үлэлээн ааспыттарын туһунан ахтан-санаан ааста.

Түгэнинэн туһанан эттэххэ, бу үөрэх кыһатыгар РСФСР үтүөлээх учуутала Б.Н.Андреев, педагогическай наука доктора, РФ үтүөлээх учуутала В.М.Анисимов, Үлэ Кыһыл Знамятын кавалера, профессор, РФ үтүөлээх учуутала, РПА чилиэн-кэрэспэдьиэнэ К.В. Павлов, медицинскэй наука доктора В.Г. Кривошапкин, экономическэй наука доктора Е.Г. Егоров, историческай наука доктора Р.И. Бравина, филологическай наука доктора В.В. Илларионов, Ил Түмэн дьокутаата М.Н. Евсеев, суруйааччылар И.Н. Николаев-Уххан, Н.В.Михалева-Сайа курдук биллиилээх дьон үөрэммиттэрэ.

Үбүлүөйгэ сылдьыбыт эрэ барыта олус дуоһуйан тарҕаста. Тэрээһин кыттыылаахтара нэһилиэк олоҕо-дьаһаҕа тупсан, элбэх ыал олохсуйан, саҥа оскуола, кулууп, спортивнай саала тутуллан, инники өттүгэр кэскилбит тупсарыгар баҕа санааларын эттилэр.

Зинаида ИГНАТЬЕВА, Сунтаар.

+1
0
+1
0
+1
0
+1
0
+1
0
+1
0
+1
0