Сиэйэ 97-лээх кырдьаҕаһа Прокопий Степанов ыйытара, туруорсара билигин да элбэх
СӨ ситэриилээх былаас 2018 сыллааҕы үлэтин отчуотун бэҕэһээ түбэйдэр, сиэйэлэр уонна түбэй дьаарханнар иһиттилэр.
СӨ Тас сибээскэ уонна норуоттар дьыалаларыгар миниистир Гаврил Кириллин салайар бөлөҕөр СӨ Ил Дархаҥҥа архитектураҕа уонна куораты тутууга Управлениетын салайааччы Ирина Алексеева, СӨ экологияҕа, айылҕаны туһаныыга уонна ойуур хаһаайыстыбатыгар миниистири бастакы солбуйааччы Семен Яковлев, уо.д.а. бааллар.
Бэҕэһээ Түбэйгэ, Сиэйэҕэ уонна Түбэй Дьаархаҥҥа дьону-сэргэни кытта көрсөн сэһэргэһиигэ, олохтоохтор ыраас иһэр уунан уонна туттарга ыраас уунан хааччыйыыны, тыа хаһаайыстыбатын оҥорон таһаарыытын, үөрэх, социальнай бэлиитикэ боппуруостарын улаханнык сэргээн, иҥэн-тоҥон ыйыталастылар. Ону сэргэ, суотабай сибээс уонна интэриниэт түргэтиирин туруорсаллар. Даҕатан эттэххэ, быйыл оператордар сибээс хаачыстыбатын тупсарар былааннаахтар.
Сиэйэҕэ бырабыыталыстыба отчуоттуур бөлөҕө Аҕа дойду Улуу сэриитин бэтэрээнигэр, СӨ тыа хаһаайыстыбатын бочуоттаах үлэһитигэр, Сунтаар улууһун бочуоттаах гражданиныгар Прокопий Афанасьевич Степановка сырытта. 97 саастаах ытык кырдьаҕас Прокопий Афанасьевич өрөспүүбүлүкэ социальнай-экономическай сайдыытыгар, кырдьаҕастарга, тыа сирин сайыннарыыга, о.д.а. туһааннаах ыйытыылары биэрдэ, санаатын үллэһиннэ. Кырдьаҕастар сэбиэттэрин чилиэнэ нэһилиэгин олоҕор билигин да көхтөөхтүк кыттар.
СӨ Тас сибээскэ уонна норуоттар дьыалаларыгар министиэристибэтин пресс-сулууспата