Сибиир уонна Уһук Илин эрэгийиэннэрэ төрөөбүт тыллары сайыннарыы үлэтин бөҕөргөтөллөр

Сибиир уонна Уһук Илин эрэгийиэннэрэ этнокультурнай үөрэхтээһини сайыннарыыга кыттыгас тэрээһиннэрин олоххо киллэрэн саҕалаатылар. Эрэгийиэннэр икки ардыларынааҕы оробуочай бөлөх “дорожнай каартаны” бигэргэттэ. Саҥардыллыбыт ФГОСнан үөрэх барыллаан былаанын булгуччулаах уонна барыйааннаах чаастарыгар төрөөбүт тылы үөрэтии итиэннэ төрөөбүт тылынан үөрэтии чаастарын элбэтэр туһунан киирбит этиилэри көрөн оҥороллор.

Саха сиригэр Ил Дархан Айсен Николаев сорудаҕынан төрөөбүт тыллары сайыннарыы – билим-мэтиэдикэ өттүнэн арыаллааһын, төрөөбүт тыллары туһаныыны сыыппараҕа киллэрии уонна тарҕатыы  инники турар судаарыстыбаннай хайысхалар быһаарыллыбыттара.

Вице-премьер Сергей Местников бэлиэтииринэн, быйыл төрөөбүт тыллар үөрэххэ платформаларын тэрийии түмүктэнэр, “Улахан быһаарыылаах тылдьыт” электроннай барыйаанын оҥоруу бырайыага саҕаланар.

Эрэгийиэннэр икки ардыларынааҕы бииргэ үлэлэһии иитинэн Сибиир уонна Уһук Илин норуоттарын төрөөбүт тылларынан үөрэтиигэ үөрэх бырагыраамаларын биир кэлим интерактивнай баана тэриллиэҕэ. Эрэгийиэннэр национальнай гимназияларыгар (оскуолаларыгар) ситимнээх бырагырааманы олоххо киллэриэхтэрэ. Ону таһынан, эрэгийиэннэр икки ардыларынааҕы тыл лааҕырын тэрийэри былаанныыллар.

Эрэгийиэннэр икки ардыларынааҕы бастакы тэрээһининэн муус устар 20 күнүгэр 9-11 кылаас үөрэнээччилэригэр Сибиир уонна Уһук Илин төрөөбүт тылларынан тэйиччиттэн олимпиаданы ыытыы буолуоҕа. Быйыл Алтай Өрөспүүбүлүкэтэ тэрийэр. Манна эрэгийиэннээҕи олимпиадалар кыайыылаахтара, миэстэлэспит оҕолор кыттыахтара. Сотору кэминэн эрэгийиэннэр икки ардыларынааҕы олимпиаданы, РФ Билимҥэ уонна үрдүк үөрэххэ министиэристибэтэ бигэргэтэр оскуола үөрэнээччилэрин олимпиадаларын испииһэгэр киллэрэри былаанныыллар.

Сибиир уонна Уһук Илин норуоттарын төрөөбүт тылларын оробуочай бөлөҕө “Сибиирдээҕи сөбүлэҥ” үөрэххэ уонна билимҥэ РФ субъектарын экэниэмикэҕэ эрэгийиэннэр икки ардыларынааҕы бииргэ үлэлэһиилэрин ассоциациятын экспертиир-сүбэлиир сэбиэтин иһинэн тэриллибитэ. Алтай, Бурятия, Саха, Тыва, Хакасия Өрөспүүбүлүкэлэрэ, Новосибирскай, Сахалин уобаластара, Красноярскай, Хабаровскай кыраайдар кытталлар.

СӨ Ил Дарханын уонна СӨ Бырабыыталыстыбатын пресс-сулууспата.

 Хаартыска: Анна ЕГОРОВА.