Бэрээдэк Уопсастыба

Сибэкки киоскатын талаабыт киһини туттулар (ВИДЕО)



Дьокуускай куоракка баламаттык халааһын, талааһын түбэлтэлэрэ дөрүн-дөрүн тахсаллар. Бэҕэһээ, тохсунньу 13 күнүн киэһэтигэр, эмиэ оннук талааһын сибэкки атыылыыр киоскаҕа буолла.  

edersaas.ru

Ол туһунан полиция дьуһуурунай чааһыгар иһитиннэрии киирээтин, быһылаан сиригэр тута суһал-силиэстийэлиир бөлөх тиийбит.

Барыллаан быһаарыынан, түүн 23.00 чаас саҕана, биир киһи сибэкки атыылыыр маҕаһыыҥҥа киирэн, быһаҕынан тирээн туран, атыылааччыттан харчы биэрэригэр модьуйбут.

Каассаҕа баар харчыны ылан баран, аны дьахтартан кумааһынньыгын көрдөөбүт. Ол кэнниттэн аны енот саҕынньаҕын былдьаан ылаат, таһырдьа ойбут. Уопсайа 40 тыһ. солк. сыаналаах хоромньу тахсыбыт.

Халабырдьыт туһунан ориентировка полиция бары нэрээттэригэр тиэрдиллибит. Ол түмүгэр, Дьокуускай полициятын талааһыннары арыйар отделениетын оперативниктара бу халааһыҥҥа уорбаланааччыны туппуттар — Амматтан төрүттээх 28 саастаах киһи эбит.

СӨ ИДьМ-тын пресс-сулууспата иһитиннэрбитинэн, бу чахчынан «Талааһын» ыстатыйанан холуобунай дьыала тэриллибит. Буруйдаах 10 сылга диэри болдьоххо көҥүлэ быһыллыан сөп.

Уорбаланааччы хаайылынна.

Санатар буоллахха, ааспыт сайын Дьокуускай куоракка бэс ыйын 25 күнүгэр, киэһэ 18.00 чаас саҕана харса-хабыра суох халааһын тахсыбытын суруйбуппут. Куорат килбэйэр киинигэр турар, дьон сөбүлээн сылдьар «Туймаада» атыы-эргиэн киинигэр «Эгэлгэ» ювелирнай фирма салонугар биир эдэр киһи 11 бриллианнаах кыһыл көмүс браслеты көрө туран, эмискэ хаба тардаат, атахха биллэрбитэ, ол барыта видеокамераҕа уһуллубут этэ.

Халаабыт браслетын сыаната 460 тыһ. солк. сыаналаах.

Дьокуускай куорат полициятын уонна ИДьМ холуобунай ирдэбилгэ оперативниктара бу халааһыҥҥа уорбаланааччыны, ааспыт сыл ахсынньытыгар туппуттара. Дьокуускай куораттан төрүттээх, урут сууттана сылдьыбыт 30 саастаах киһи эбит. Уорбут браслетын атыылаабыт.

Онтон соторутааҕыта, тохсунньу 10 күнүгэр, эмиэ киэһэ Дьокуускай куорат Дежнев аатынан уулуссатыгар баар арыгы маҕаһыынын сарбыдах саалаах киһи киирэн талаабыта. Саанан үөһэ ытыалаан баран, хас да бытыылка арыгыны алдьаппыт, атыылааччыны куттаан туран, 47 тыһ. солк. харчыны ылан тахсыбыт. Бу талабырдьыты була, тута иликтэр.

Биһиги корр., «Саха сирэ» хаһыат, edersaas.ru

Хаартыска: интэриниэттэн.

Видео: СӨ ИДьМ-тын пресс-сулууспата.

0
0

Санааҕын суруй