Горнай улууһугар Бэрдьигэстээххэ буолаары турар XXI Манчаары оонньууларыгар бэлэмнэнэн, олохтоохтор төрөөбүт дойдуларын тупсарыыга көхтөөхтүк кытталлар.
Бу суолталаах тэрээһиҥҥэ Дьокуускай куоракка олорор биир дойдулаахтар түмсүүлэрэ норуот көҕүлээһинигэр эмиэ үөрэ-көтө кытталлар. Бу туһунан дойдулаахтар салайааччылара Надежда Федорова санаатын бу курдук үллэстэр:
— «Горнай түмсүү» социальнай бырайыактарын ааптара, меценат Лена Андреева бу күннэргэ бөһүөлэкпит сибэккилэринэн киэркэйдин, «Бэртээхэй Бэрдьигэстээх сэлиэнньэтэ» дэттин диэн санаанан салайтаран, сибэкки иһиттэрин бэлэх уунна.
«Горнай түмсүү» аатыттан үтүө санаалаах Лена Петровнаҕа махталбытын тиэрдэбит. «Манчаары оонньуулара» үрдүк таһымнаахтык баралларыгар бу курдук бары күүспүтүн уурдахпытына, ыалдьыттарбыт улууспутун өрүү үтүө тылынан ахтыахтара«.
Хас биирдии киһи туора турбакка, Лена Андреева курдук төрөөбүт дойдутун туһугар үтүө дьыаланы оҥордоҕуна, Сахабыт сирэ чэчирии сайдыаҕа.
Елена ПОТОЦКАЯ, «Саха сирэ» хаһыат, edersaas.ru