Өрөспүүбүлүкэҕэ сибээс тэтимнээхтик сайдан иһэр буолан, дьон туһанара хаһааҥҥытааҕар да үксүүр. Ол курдук, Нам улууһугар сибээс, түргэн интэриниэт ситимэ олох хаамытынан эмиэ сайдар. Улуус бары нэһилиэктэригэр олохтоохтор интэриниэт ситимигэр холбонууларын «Ростелеком» ПАУо Саха сиринээҕи салаатын Намнааҕы филиала сүрүннүүр. Маны сэргэ, улуустааҕы үөрэх салаатын тэрилтэлэрэ бары «СӨ ТЦТР» ГУТ өҥөтүнэн туһаналлар. Биһиэхэ Нам улууһун баһылыга Юрий Слепцов сибээскэ таҕыста.
—Сэтинньи 20 күнүгэр Ил Дархан сибээһи тэтимнээхтик сайыннарыыга туһулаабыт ыйааҕынан, «Кэбээйи экспреһэ» диэн бырайыагы олоххо киллэрии чэрчитинэн, Таастаах нэһилиэгэр «СӨ ТЦТР» ГУТ күүстээх, тэтимнээх үлэни ыытан оптоволокно ситимин тартылар. Манна олохтоохтор интэриэстээх буоланнар, нэһилиэктэригэр түргэн тэтимнээх интэриниэт кэлиитигэр күргүөмүнэн остуолба маһын туруораннар күүс-көмө буолбуттара хайҕаллаах. Маннык үлэ салгыы Салбаҥ нэһилиэгэр ыытыллар. Ол курдук, билиҥҥи туругунан 57 киһи сайабылыанньа суруйбут. Онон улуус кииниттэн тэйиччи сытар нэһилиэк түргэн тэтимнээх интэриниэт ситимигэр холбонон, олохтоохтор үөрүүлэрэ үксээтэ. Дойду, өрөспүүбүлүкэ, улуус сонуннарын тута билэ-көрө олорор, араас хабааннаах өҥөнү дьиэлэриттэн оҥорторор кыахтаннылар. Маны таһынан, улуус киинин нэһилиэгэр «Ростелеком» ПАУо «WiMAX» диэн салгынынан бэриллэр интэриниэт өҥөтүнэн туһанан эрэллэр.
Маннык инновационнай, цифровой сайдыы тэтимирэн, хас биирдии киһи, тэрилтэ салайааччылара, үлэһиттэрэ сатаан туһаналларыгар тоҕоостоох кэм кэллэ. Тыа хаһаайыстыбатын салаатыгар Бүтүн Арассыыйатааҕы «Меркурий» бырагыраамаҕа бааһынай хаһаайыстыбалар, предпринимателлэр киирэн туһанан эрэллэр. Улуус дьаһалтата киирэр-тахсар докумуон дьыалатын электроннай формаҕа киллэрэн көдьүүстээхтик туһана олорор. Хас биирдии нэһилиэк бибилэтиэкэлэригэр электроннай хайысханы толору туһанарга анаан интэриниэт ситимэ холбоноругар үлэлэһэллэр. Үөрэх тэрилтэлэрэ онлайн олимпиадаларга, куонкурустарга кытталлара билигин күүскэ ирдэнэр буолла. Онон оҕолор бары өттүнэн сайдалларыгар түргэн тэтимнээх интэриниэт олус наадатын сэргэ, күннээҕи олохпут ирдэбилэ буолла. Эһиилги сылга «Нам улууһа» МТ дьаһалтата, үөрэх управлениета бары бииргэ көмөлөөн үлэлэһэн, дьоҕурдаах оҕолору түмэн, Н.С.Охлопков аатынан улуустааҕы гимназиябытыгар кванториум тэрийэн, саҥа кылаас комплегын тэрийэр сыал-сорук турар. Үлэбит итинник салҕанан, сибээс сайдыытын кытары тэҥҥэ хардыылаан иһиэ.
Сардаана БАСНАЕВА, «Саха сирэ» хаһыат
Сүрүн хаартыска: интэриниэттэн