Социалистическай үлэ Дьоруойа, ССРС Сибээһин министиэристибэтин Саха сиринээҕи производственнай-тиэхиньичэскэй управлениетын салайааччыта, САССР Үрдүкү Сэбиэтин Президиумун бэрэссэдээтэлин солбуйааччы, САССР Миниистирдэрин Сэбиэтин бэрэссэдээтэлин солбуйааччы Петр Дудкин өрөспүүбүлүкэҕэ сибээс сайдыытыгар дьоһун кылаатын киллэрбит киһинэн биллэр.
Анивера Акимова, «Саха сирэ» хаһыат, https://edersaas.ru/
Петр Иванович Дудкин өр сыллар тухары электрическэй сибээс, почта материальнай-тиэхиньичэскэй базата, араадьыйа, АТС-тар уонна телерадиоцентр сайдыытыгар бары күүһүн ууран туран үлэлээбитэ. Кини аатын үйэтитэр сыаллаах хас даҕаны сыллааҕыта Дьокуускай куоракка Курашов уулуссатыгар «Сахателеком» ААУо административнай дьиэтигэр Дудкин мемориальнай дуоската туруоруллубута. Сибээс эйгэтин биллиилээх үлэһитин аатын Дьокуускайдааҕы телекоммуникация, сибээс уонна информационнай технология коллеһа сүгэр.
2011 сыллаахха сибээс уонна информатизация технологияларын салааларыгар П. И. Дудкин аатынан Судаарыстыбаннай бириэмийэ олохтонон, бастакы лауреатынан 2012 сыллаахха «Ростелеком» филиала «Сахателеком» ААУо куораттааҕы техническэй эксплуатацияҕа сулууспатын начаалынньыга Игорь Лиханди ааттаммыта. Игорь Владимирович туруорсуутунан S-12 станция үлэҕэ киллэриллэн, Кэбээйи, Хаҥалас, Нам уонна да атын улуустар цифровой сибээскэ көһөрүллүбүттэрэ. Маны таһынан, Дьокуускайга GPON, Metro Ethernet ситимнэр оптическай утахтара тардыллан, олохтоохтор сыыдам интэриниэтинэн хааччыллыбыттара.
2013 сыллаахха П.И. Дудкин бириэмийэтинэн «Тэлэбиидэнньэнэн уонна араадьыйанан биэрии тиэхиньиичэскэй киинэ» ГУП генеральнай дириэктэрин бастакы солбуйааччы Андрей Ребров наҕараадаламмыта. Андрей Иванович сыралаах үлэтин түмүгүнэн, Дьокуускай олохтоохторо 20 ханааллаах кабельнай тэлэбиидэнньэнэн хааччыллыбыттара. «Программы развития высоких технологий в телекоммуникациях, телевидения и радиовещании в РС(Я)» бырагырааманы олоххо киллэрии чэрчитинэн, өрөспүүбүлүкэҕэ 255 телевизионнай саҥа ретранслятордар туруоруллан, нэһилиэнньэ 99,7% олохтоох тэлэбиидэнньэни көрөр кыахтаммыта.
2014 сыллаахха сибээс эйгэтигэр дьоһун суолталаах бириэмийэнэн «Сахателеком» («Ростелеком») куораттар икки ардыларынааҕы сибээһин уонна тэлэбиидэнньэтин киинин салайааччыта Георгий Ипатьев наҕараадаламмыта. Кини үлэлиир кэмигэр, 1996 сыллаахха Дьокуускай – Алдан – Сковородино Р184 магистраль цифровизацияламмыта. 2013 сыллаахха сэтинньигэ Тында – Дьокуускай хайысхатынан оптическай утах тутуллубута.
2015 сыллаахха РСФСР үтүөлээх связиһа, РСФСР сибээһин маастара, информатизация аан дойдутааҕы академиятын бочуоттаах академига Николай Николаевка Дудкин аатынан бириэмийэ туттарыллыбыта. Николай Васильевич Петр Дудкины кытары бииргэ үлэлээн, киниттэн элбэххэ үөрэммитэ. Араадьыйанан уонна тэлэбиидэнньэнэн биэрии сайдыытыгар киэҥ далааһыннаах үлэ ыытыллан, 1982 сыллаахха Дьокуускайга тэлэбиидэнньэ башнята тутуллубута. Сибээс радиорелейнэй ситимнэрэ Хаандыгаҕа, Өлүөхүмэҕэ, Сааскылаахха, Уус Ньараҕа тардыллыбыттара. Бу баараҕай суолталаах үлэ ыытыллыытыгар Николай Николаев өҥөтө улахан.
2016 сыллааҕы бириэмийэни Михаил Перетолчин ылбыта. Михаил Алексеевич «Тэлэбиидэнньэнэн уонна араадьыйанан биэрии тиэхиньиичэскэй киинэ» ГУП-ка 1979 сылтан үлэлиир. 1998 сыллаахха Ленскэйгэ улахан уу кэлэн, Михаил Перетолчин станция технологическай оборудованиетын быыһаан, куоракка тэлэбиидэнньэ уонна араадьыйанан биэрии суһаллык чөлүгэр түһэриллибитэ. 2011 сыллаахха Ленскэйгэ саҥа станция уонна тэлэбиидэнньэ башнята тутуллуутугар үлэлэспитэ.
П.И.Дудкин аатынан Судаарыстыбаннай бириэмийэ өрөспүүбүлүкэ сибээһин сайдыытыгар улахан кылааттарын киллэрбит дьоҥҥо сыллата Араадьыйа күнүгэр – ыам ыйын 7 күнүгэр – туттарыллар. Лауреат 500 тыһ. солкуобайдаах бириэмийэнэн наҕараадаланар. Билигин докумуоннары ылыы номнуо саҕаланна.
Анивера Акимова, «Саха сирэ» хаһыат, https://edersaas.ru/Ыспыраапка: Докумуоннары Дьокуускай к., Киров уул., 18 нүөмэригэр («В» блок) 207 кабинекка аҕалан туттарыҥ (төлөпүөн (4112) 506296).