Бэлиитикэ Маны аах

Сибээһи бөҕөргөтөр кэскиллээх кэпсэтии ыытылынна

Германия Сибииргэ уонна Уһук Илиҥҥэ Генеральнай консулун кытта көрсүһүү буолла, сэргэх, кэскиллээх кэпсэтии ыытылынна.
Дьокуускайга Германия Федеративнай Өрөспүүбүлүкэтин Сибииргэ уонна Уһук Илин федеральнай уокуругар Генеральнай консула Бернд Финке кэлэ сылдьар. Кинини Новосибирскайга  боротокуолга уонна Германия Федеративнай Өрөспүүбүлүкэтин эрэгийиэннэри кытары сибээскэ Генеральнай консульствотын координатора Светлана Винокурова арыаллыыр. Дипломат бүгүн СӨ Тас сибээскэ уонна норуоттар дьыалаларыгар миниистир Гаврил Кириллины кытары көрүстэ.
Көрсүһүүгэ Дьокуускайга Арассыыйа МИД бэрэстэбиитэлэ Вера Сидорова, СӨ Тас сибээскэ уонна норуоттар дьыалаларыгар миниистири солбуйааччы Сергей Хатылыков, министиэристибэ үлэһиттэрэ кыттыыны ыллылар. Дьыалабыай көрсүһүүгэ икки өртүттэн үөрэх эйгэтигэр, наукаҕа чинчийии үлэлэригэр, атыы-эргиэн,  инвестиционнай бииргэ үлэлээһин, муниципальнай таһымҥа сибээһи бөҕөргөтүү туһунан дьүүллэстилэр.
Генеральнай консул Арассыыйа Наукаларын Академиятын Сибиирдээҕи салаатын ирбэт тоҥу чинчийэр институтун профессора Михаил Григорьевка наука уобалаһыгар Германия-Арассыыйа сыһыаннаһыыларын сайыннарыыга үтүөлэрин иһин  «За заслуги перед Федеративной Республикой Германия» уордьаны туттарар соруктаах кэлбитин эттэ. Көрсүһүү түмүгэр миниистир Гаврил Кириллин 2022 сылга Саха АССР 100 сыла бэлиэтэнэрин эттэ, Генеральнай консулу үбүлүөйдээх ыһыахха кыттарга ыҥырда.
0
0