Айылҕа харыстабыла

Шелкопряды суох оҥоруу үлэтэ ыытыллыаҕа

Бэс ыйын ортотун диэки Дьокуускайга, Хаҥалас уонна Нам улуустарыгар шелкопряды бохсор үлэни ыытыахтара.

Үлэ ыытыллар күнэ-дьыла  эрдэ былааннаммытынан, бэс ыйын 15 күнүттэн саҕаланыахтааҕа, кэнники өссө чопчуланыаҕа.

Сибиир шелкопряда хойуутук тарҕаммыт сиригэр тиэрдэр ойуур суолларыгар, үлэ ыытылла турдаҕына уонна харантыын болдьоҕун устата, дьон сырыыта бобулларын туһунан нэһилиэнньэни сэрэтэр биллэриилэр туруоруллуохтара. Шелкопряды утары ойууру эмтээһин үлэтин кэмигэр уонна кэнниттэн сэрэтиллибит учаастактартан  тэллэйи, отону, эмтээх оттору уонна да атын сиэниллэр сир аһын хомуйууттан туттунары сүбэлииллэр.

Саха сирин Экологиятын министиэристибэтэ биллэриллибит харантыын кэмигэр бу учаастактарга сылдьартан туттунарга ыҥырар.

Санатан эттэххэ, былырыын Өлүөнэ өрүс быысаһыытынан Дьокуускай, Хаҥалас уонна Нам ойуурдарын хаһаайыстыбатын сиригэр-уотугар 205 тыһыынча гектар иэннээх сиргэ Сибиир шелкопрядын булбуттара.

Шелкопряд хойуутук үөскээбит-тэнийбит сирдэрин «Клонрин» диэн химическэй препаратынан авиационнай ньыманы туһанан эмтииргэ быһаарыы ылыллыбыта.

Препарат дьаатын кээмэйинэн кутталлаах үһүс кылааска киирсэр. Олоххо уонна доруобуйаҕа куттала суох буолуутун ирдэбилигэр эппиэттиир.

 

edersaas.ru

0
0