Сэргэлээххэ көхтөөх устудьуон оскуолата үлэтин саҕалаата

Ааптар: 
Бөлөххө киир:

Бэҕэһээ, алтынньы 16 күнүгэр, “Сэргэлээх уоттара” култуура киинигэр “Актыып оскуолата-2018” диэн устудьуоннар икки ардыларыгар сыл ахсын ыытыллар тэрээһин аһыллыыта буолан ааста. “Актыып оскуолата”  — саҥаны билии, арыйыы, бары өттүнэн сайдыы, лидерскэй уонна айар хаачыстыбаларын сайыннарыы, күүһүрдүү. “Актыып оскуолатын” кыттыылааҕа буолуу — хас биирдии актыбыыс баҕа санаата.  Бу тэрээһин номнуо 14-с төгүлүн ыытыллар, кытаанах сүүмэрдээһини ааһан, быйыл 85 бастыҥтан бастыҥ устудьуон кыттыыны ылыаҕа.

Көрөөччүлэр, ыҥырыылаах ыалдьыттар уонна тэрээһин ааспыт сыллааҕы кыттааччылара саала иһин бүтүннүүтүн толорон, үөрүүлээх күнү үллэһиннилэр. Ыччат сэҥээрэн истэр ырыаһыттара Аскалон Семенов уонна “Snow voice” бөлөх уолаттара киэһэни киэргэттилэр. Кыттааччылар үгэс быһыытынан, факультетынан, институтунан параад оҥордулар, хас биирдиилэрэ бэйэлэрин олус үчүгэйдик, толору бэлэмнээхтэрин көрдөрдүлэр. Бу сылга актыбыыс андаҕарын этэр чиэскэ “Актыып оскуолатын-2018” кыттыылааҕа, геолого-разведочнай факультет устудьуонугар Дьулустаан Пестеровка тигистэ.

Бүгүн саамай кэтэһиилээх-манаһыылаах кистэлэҥ арылынна – кыттааччылар ханнык өҥнөөх этэрээккэ баар буолбуттарын уонна баһаатайдарын ааттарын биллилэр. Инникитин бу биир хамаандаҕа түбэспит оҕолор түөрт нэдиэлэ устата арахсыспат табаарыстыы, биир дьиэ кэргэн курдук буолаллар.

Баһаатайдар: от күөх этэрээт – Гликория Оконешникова, Степан Константинов, халлаан күөх этэрээт – Лия Сидорова, Сулустаан Алексеев, араҕас этэрээт – Светлана Колодезникова, Христофор Захаров, фиолетовай этэрээт – Айгыына Тотонова, Айысхан Гоголев, оранжевай этэрээт – Айталина Павлова, Дьулусхан Андросов.

“Актыып оскуолата-2018” кыттыылаахтарыгар ситиһиини, табыллыыны!

Лера Львова, edersaas.ru

+1
0
+1
0
+1
0
+1
0
+1
0
+1
0
+1
0