Дьокуускайга үөрэх кыһаларыгар тутар хамыыһыйалар үлэлэрэ муҥутаан турар кэмэ. Босхо үөрэххэ киирбит абитуриеннар испииһэктэрэ биллибитин кэнниттэн, төлөбүрдээх үөрэххэ киирии боппуруоһа сытыытык туруоҕа. Төлөбүрдээх үөрэххэ киирбит устудьуоҥҥа көмө буолан, Саха Государственнай Тыа Хаһаайыстыбатын академията эдэр дьон үөрэх төлөбүрүн бэйэтэ үлэлээн-хамнаан төлүүрүгэр бырагыраама олохтоото. Ол туһугар улуустарга баар оҥорон таһаарар тэрилтэлэри кытта сөбүлэһии түһэристэ.
Ол курдук, Горнай, Таатта, Амма, Бүлүү, Үөһээ Бүлүү, Кэбээйи, Мэҥэ Хаҥалас, Дьааҥы, Ньурба, Өлүхүмэ, Уус Алдан, Хаҥалас тэрилтэлэрэ академия устудьуоннарыттан харчыга бородууксуйаны тутуохтара. Үөрэх төлөбүрүн сүрүн бырагырааматыгар быйылгы абитуриеннары кытары үөрэнэ сылдьар устудьуоннар эмиэ кыттыахтарын сөп. Бу бырагыраамаҕа кыттыан баҕалаах устудьуон тугу гыныахтааҕый?
Үрүҥ ас, барыанньа, морс, быырпах, кымыс оҥорон таһаарар, улуус тэрилтэтигэр үүт, отон туттарар. Бэлэмнээччи бородууксуйаны сыанатын квитанцияҕа толорон биэрэр уонна ыйыллыбыт сууманы академияҕа ыытар. Ханнык бородууксуйаны туттарыан сөбүн устудьуон СХПК-ны кытта эрдэттэн сүбэлэһиэн сөп. Туттарыллыбыт бородууксуйа харчытынан устудьуон үөрэҕэ төлөнөр. Сиһилии бырагыраама туһунан www.ysaa.ru СГТХА сайтыгар киирэн ааҕыаххытын сөп.
«Саха сирэ» хаһыат, edersaas.ru