«Север» киин эрэгийиэннэр икки ардыларынааҕы куонкурус кыайыылааҕынан буолла

Ааптар: 
Бөлөххө киир:

РФ бырабыыталыстыбатын бэрэссэдээтэлин солбуйааччы Дмитрий Чернышенко уонна бэрэсидьиэн көмөлөһөөччүтэ Андрей Фурсенко научнай-үөрэтэр кииннэр (НОЦ) Сэбиэттэрин мунньаҕын ыыттылар.

 

Мунньахха наука уонна үрдүк үөрэхтээһин миниистирэ Валерий Фальков, РАН бэрэсидьиэнэ Александр Сергеев, тыа хаһаайыстыбатын, доруобуйа харыстабылын, экономическэй сайдыы министиэристибэлэрин бэрэстэбиитэллэрэ итиэннэ бөдөҥ хампаанньалар салайааччылара кыттыыны ыллылар. Куонкуруска киллэриллибит эрэгийиэннэр икки ардыларынааҕы Научнай-үөрэтэр кииннэр концепциялара сырдатылынна.

Бүгүн биһиги биэс научнай-үөрэтэр киини – 2021 сыл кыайыылаахтарын быһаардыбыт. Итинэн бэрэсидьиэн быйылгы сылы Наука уонна технология сылынан биллэрэригэр, аан дойду таһымнаах 15 научнай-үөрэтэр киини тэрийэр соругу туруорбутун толордубут. Бу кииннэр бары эрэгийиэннэр икки ардыларынааҕылар, кинилэр тустаах эрэгийиэннэр уратыларын, наадыйыыларын уонна идэтийиилэрин учуоттаан оҥоһуллубут научнай-технологическай бырайыактар олоххо киллэриллэллэрин суотугар, субьектар экономикаларын ситимнэһиилэрин хааччыйыахтара, – диэтэ Дмитрий Чернышенко.

Быйылгы сыл түмүгүнэн бу НОЦ-тар үлэлэрэ анаалыстаныахтаах. Онуоха анаан НОЦ Сэбиэтин иһинэн оробуочай бөлөх тэриллибит, салайааччынан наука уонна үрдүк үөрэхтээһин миниистирэ Валерий Фальков анаммыт. Билигин Наука уонна үрдүк үөрэхтээһин министиэристибэтэ экспертэри кытары НОЦ-тар үлэлэрин сыаналааһын ирдэбиллэрин оҥорууну саҕалаабыттар уонна ону сотору кэминэн оробуочай бөлөх чилиэннэригэр билиһиннэриэхтэрэ.

Кыайыылаах Научнай-үөрэтэр кииннэр (НОЦ-тар):

1.«Хоту дойду: бигэтик сайдыы территорията» НОЦ, Саха Өрөспүүбүлүкэтин Ил Дархана Айсен Николаев уонна Камчатка кыраайын губернатора Владимир Солодов киллэрбит бырагыраамалара. Сүрүн сыала – Арассыыйа хотугулуу-илиҥҥи уонна Арктикатаҕы территориятыгар наука уонна технология кыаҕын туһаныы, киллэрии.

2. «Енисей Сибиирэ» НОЦ, Красноярскай кыраай губернатора Александр Усс киллэрбит бырагыраамата. Арассыыйаҕа бастакы климатическай НОЦ.

3. «Байкал» НОЦ, Иркутскай уобалас губернатора Игорь Кобзев уонна Бүрээт Өрөспүүбүлүкэтин баһылыга Алексей Цыденов бырагыраамалара. Күөх технологияҕа уонна эколоия өттүнэн куттал суох буолуутугар туһаайыллыбыт.

4. «МореАгроБиоТех» НОЦ, Севастополь губернатора Михаил Развожаев киллэрбит бырагыраамата. Үрдүк технологиялаах ырыынактары, муора технологияларын сайыннарыыга анаммыт.

5. «Арассыыйа соҕурууҥҥу өттө» НОЦ, Ростов уобалаһын губернатора Василий Голубев киллэрбит бырагыраамата. Агропромышленнай бырайыактарга анаммыт.

Санатан эттэххэ, 2019 уонна 2020 сс. биэстии НОЦ талыллыбыттара. Быйыл эмиэ биэс НОЦ талылынна, онон аан дойду таһымнаах 15 научнай-үөрэтэр киин тэрилиннэ. Ол иһигэр, Саха Өрөспүүбүлүкэтин Ил Дархана Айсен Николаев уонна Камчатка кыраайын губернатора Владимир Солодов киллэрбит бырагыраамалара баар.

Айсен Сергеевич инстаграмҥа бэйэтин страницатыгар: «13 бырайыактан биһиги бырайыакпытын дьүүллүүр сүбэ үрдүктүк сыаналаан, биэс бастыҥ иһигэр киирдибит. Онон федеральнай граны сүүйдүбүт. Бу биһиги бары уопсай кыайыыбыт!», — диэн суруйда.

Раиса Сибирякова, «Саха сирэ»,  edersaas.ru

+1
0
+1
0
+1
0
+1
0
+1
0
+1
0
+1
0