Сэттис этээстэн сууллубут кыргыттар өлбүт чахчыларынан дьыала тэрилиннэ
Сайтпытыгар бу дьыл ыам ыйын 28 күнүгэр «Түннүктэн сууллубут кыргыттартан биирэ өлбүт, иккиһэ ыарахан туруктаах» диэн иһитиннэрии бэчээттэммитэ.
Онно Дьокуускай куоракка ыам ыйын 27 күнүн киэһэтигэр Ленин проспегын 52 №-гэр турар «Asia hall» элбэх мэндиэмэннээх дьиэттэн 15 саастаах кыргыттар сууллубуттарын, биирдэстэрэ тута миэстэтигэр өлбүтүн, иккиһэ ыарахан туруктаах Национальнай медицина киинин 1 №-дээх өрөспүүбүлүкэтээҕи балыыһатын Педиатрическай киинигэр киллэриллибитин туһунан суруйбуппут.
Итиэннэ силиэстийэ уорганнара ити чахчынан процессуальнай бэрэбиэркэ ыыталлар, ол түмүгүнэн, процессуальнай быһаарыы тахсыаҕа диэн иһитиннэрбиппит.
Ыам ыйын 29 күнүгэр СӨ Доруобуйа харыстабылын министиэристибэтин пресс-сулууспата иһитиннэрбитинэн, балыыһаҕа киллэриллибит иккис кыыс түүн 00.00 чааска эмиэ өлөөхтөөбүт.
Биһиги сайтпытыгар биллибитинэн, процессуальнай бэрэбиэркэ түмүгүнэн, силиэстийэ уорганнара бу чахчынан холуобунай дьыала тэрийбиттэр.
Ол эрээри, ханнык ыстатыйанан тэриллибитин, барыллаан бэрэбиэркэ тугу быһаарбытын туһунан «источникпыт» тугу да эппэтэ. Барыта дьыала силиэстийэлэнэр кэмигэр быһаарыллыаҕа диэн буолла.
Биһиги корр., «Саха сирэ» хаһыат, edersaas.ru
Хаартыска: интэриниэттэн.