«Сэттээх сир. Ыйаах» саҥа киинэттэн тугу күүтэбит?

Бөлөххө киир:

Алтынньы 1 күнүттэн Саха сирин бары киинэ тыйаатырдарыгар «Сэттээх сир. Ыйаах» киинэ көстүөҕэ.

Киинэни «Сайдам Барыл» устуудьуйа уһулла. Саҥа киинэҕэ 23 сыллааҕыта ааспыт кэм салгыыта көстөр. Сүрүн дьоруойдар кыыстара 23 саастаах Алена Москваттан Дьокуускайга кэлэр. Кини манна ийэтэ сураҕа суох сүтэр. Полицияларга биллэрэллэр. Салгыы кыыс ийэтэ таксинан Сымыр диэн дэриэбинэҕэ барбыта биллэр. Алена онно барарга сананар…

Сүрүн оруолу саха киинэтигэр саҥа аат Виолетта Христофорова толорор. Виолетта 2018 сыллаахха «Мисс Республика Саха (Якутия)» куонкуруска «Мисс Интернет» буолары ситиспитэ. Кини Өлөөн улууһуттан төрүттээх.

Виолеттаны сэргэ 1996 сыллаахха тахсыбыт «Сэттээх сир» киинэҕэ (режиссер Эллэй Иванов) уһуллубут Саха тыйаатырын артыыстара Надежда Ушницкая уонна Петр Баснаев саҥа киинэҕэ эмиэ бааллар. Хартыына режиссерунан Степан Бурнашев үлэлээтэ.

«Сэттээх сир» киинэ бастакы чааһын манна көрүөххүтүн сөп: «СЭТТЭЭХ СИР» 


Саҥа киинэ туһунан киинэни ырытааччы, NIKOLAYATE диэн ютуб-блогтаах Николай Корякин санаатын үллэстэр:

— «Сэттээх сир» киинэ салгыытын устар улахан эппиэтинэс дии саныыбын. Бүтүн өрөспүүбүлүкэ барыта билэр, бары куттаммыт киинэбит буолар. Мин оҕо сырыттахпына «Саха» НКИХ ханаалыгар көстүбүтэ. Ону куттанан көрбөтөҕүм, саҥатын эрэ истибитим. Мин санаабар, бу киинэ бар дьон өйүгэр-санаатыгар кутталлаах киинэ диэн хаалбыт буолуохтаах. Онон иккис чааһыттан эмиэ оннугу күүтүллэр.

Көрөөччүлэр киинэ бастакы чааһа хоррор, иккис чааһа ужас жанрдаах уһуллубуттарын өйдүөхтэрин наада. Бу — икки тус-туспа жанр. Бастакы чааһыгар абааһы көстүбэт, киһи тыаһы-ууһу истэн, оҥорон көрүүтэ оонньоон куттанар. Оттон ужаска бу эмиэ баар өйдөбүллэр, ол эрээри манна абааһы баар буолуон сөп.

Степан Бурнашев — уопуттаах режиссер. Кини экпсерименниирин сөбүлүүр, ужаһы да уста сылдьыбыта. Киниттэн үчүгэй хартыынаны күүтэбин. Сүрүн оруолу толорор кыыстан элбэҕи эрэйиллэр. Кини оруолун кыайбыта дуу, суоҕа дуу диэн санаалар бааллар. Дьиҥэ, саҥа киинэ аатын уларытан, көннөрү ужас киинэ курдук оҥоруохха эмиэ сөп этэ. Оттон «Сэттээх сир» салгыыта буолара атын таһымы биэрэр.

Аны бу киинэни мин дойдубар — Горнай Маҕараһыгар уһулбуттара. Онон биир дойдулаахтарбын киинэҕэ көрүөм. Биир бэйэм долгуйа уонна үөрэ саҥа киинэни күүтэбин.

Киинэ тизерин көрүҥ:

edersaas.ru

Хаартыскалар — интэриниэттэн.

+1
0
+1
0
+1
0
+1
0
+1
0
+1
0
+1
0