Сэттэ улуус нэһилиэнньэлээх пуунуттан чугас баһаардары ураты хонтуруолга туталлар
СӨ бырабыыталыстыбатын бэрэссэдээтэлин бастакы солбуйааччы Дмитрий Садовников ойуур баһаардарын атырдьах ыйын 8 күнүнээҕи туругун билиһиннэрдэ.
СӨ бырабыыталыстыбатын бэрэссэдээтэлин бастакы солбуйааччы Дмитрий Садовников брифинг кэмигэр: “Саха сирин Горнай улууһун Бэс Күөл, Күөрэлээх, Маҕарас, Кэптин, Кэбээйи улууһун Кальвица, Сииттэ, Сангаар, Таатта улууһун Ытык Күөл, Томпо улууһун Ударник, Үөһээ Бүлүү улууһун Хомустаах, Далыр, Дүллүкү, Кырыкый, Нам улууһун Салбаҥ, Уус Алдан улууһун Кылаайы нэһилиэнньэлээх пууннарыгар суоһуур ойуур баһаардарын өрөспүүбүлүкэтээҕи суһал ыстаап ураты хонтуруолга тутар”, — диэн иһитиннэрдэ.
Ыстаап үлэтин салгыыр. Уоту утары охсуһааччылар ахсааннара, сириэстибэлэр эбиллэллэрин, суһал ыстаап сайаапкатынан, ордук кутталлаах учаастактарга уунан ыһар бөртөлүөттэр үлэлиэхтэрэ диэн эттэ.
“Саха сирэ” хаһыат, edersaas.ru