Сунтаар улууһугар ыытыллыбыт күрэхтэһиигэ сэттэ саастаах Камила Тимофеева 4 киилэлээх гиирэни 10 мүнүүтэ иһигэр үөһээ-аллараа 50-чата анньан сөхтөрдө.
edersaas.ru, Мария Кобельянова
Эдьиийдэрин кытта спорт бу көрүҥүнэн анаан-минээн дьарыктанар. Кинилэри аҕалара Афанасий Тимофеев эрчийэр. Сунтаарга гиирэ спордун коррекционнай оскуола көҕүлээн, бу күннэргэ үһүс төгүлүн күрэхтэһии тэрийдэ. Учуутал, тэрийээччи, спорт бу көрүҥүн көҕүлээччи Афанасий Тимофеев гиирэ оҕолору тулуурга, дьулуурга үөрэтэр диэн санаатын үллэстэр. Быйылгы күрэс аһаҕас турнир быһыытынан тэриллэн, Өлөөнтөн, Үөһээ Бүлүүттэн, Бүлүүттэн, Ньурбаттан, Сунтаартан уопсайа 83 оҕо кытынна. Ыалдьыттар маннык күрэхтэһии Сунтаарга сайдан үрдүк таһымнаахтык ыытылларыгар махталларын биллэрэллэр. Гиирэ спорда саха ыччатыгар сайдар кэскиллээҕин бу күрэстэн көрүөххэ сөп, аҥаардас 83 кыттааччыттан 10-на кыыс. Бу эмиэ интэриэһинэй көрдөрүү .
Мария Кобельянова, Сунтаар, edersaas.ru