Арассыыйатааҕы Ийэ күнүн иитинэн элбэх оҕолоох, холобур буолар ийэлэри СӨ бырабыыталыстыбатын бэрэссэдээтэлэ Андрей Тарасенко онлайн көрүҥүнэн эҕэрдэлээтэ, наҕараадалары туттарда. Кинилэр кэккэлэригэр “Ийэҕэ Албан аат” III истиэпэннээх бэлиэнэн Өлүөхүмэ улууһун Кыыллаах нэһилиэгин сэттэ оҕо амарах ийэтэ Любовь Торговкина наҕараадаланна.
“Оҕону иитии – улуу уонна саамай сүрүн үлэ. Өрөспүүбүлүкэ бары ийэлэрин дьиэ кэргэни бөҕөргөтүүгэ суолталаах кылааккыт, дьиэ кэргэн үгэстэрин сайыннарыыгыт уонна көхтөөх уопсастыбаннай олоххут иһин махтанабыт. Саха сирин дьоһуннаах көлүөнэтин иитэн таһаараргытыгар эһигини өйүөхпүт, көмөлөһүөхпүт” – диэн Андрей Тарасенко эттэ.
Тэрээһин онлайн эрсииминэн ыытыллыбыт буолан, Любовь Симовнаҕа үрдүк наҕарааданы Кыыллаах нэһилиэгин баһылыга Раиса Лавернова, “Ийэ кут” түмсүү салайааччыта Антонина Маркова туттардылар.
Любовь Симовна ыраах Булуҥ улууһун Күһүүр сэлиэнньэтиттэн төрүттээх. Оскуола кэнниттэн Дьокуускайдааҕы СПТУ-га буҕаалтыр идэтигэр үөрэнэ сылдьан кэргэнин Степан Афанасьевиһы кытта билсэн ыал буолбуттар. Ол курдук, 19 сыл анараа өттүгэр ырыаҕа ылламмыт, хоһооҥҥо хоһуллубут Кыыллаах Арыыга кийииттии тиийбит. Биэс хорсун уол, икки кыталык кыыс оҕолорго күн сирин көрдөрөн, оҕолорунан дьоллоохтор.
“Элбэх оҕону көрөр төһө сылаалааҕый?” — диэн ыйыталаспыппар: “Суох. Саамай сүрүнэ улахан оҕолору сөпкө иитиэххэ наада итиэннэ улахаттар көмөлөрө элбэх”, — диэн хоруйдуур. Чахчыта даҕаны оннук. Торговкиттар дьиэ кэргэн оҕолоро бары үөрэхтэригэр үчүгэйдэр, туохтан даҕаны толлон турбат туруу үлэһиттэринэн биллэллэр.
Ол курдук, улахан уоллара Артем оскуоланы кыһыл көмүс мэтээлинэн бүтэрбитэ, ХИФУ математикаҕа, информатикаҕа институтун устудьуона. Иккис уол Айгылаан П.И. Дудкин аатынан Дьокуускайдааҕы сибээс уонна энергиэтикэ кэллиэһигэр үөрэнэр. Коля, Сим, Амина – оскуола үөрэнээччилэрэ. Кыра кыыс Амелия уһуйаан иитиллээччитэ. Муруннарын бүөтэ Степа – биирдээх, билиҥҥитэ дьиэҕэ олорор.
Любовь Симовнаттан оҕолоруҥ тугунан дьарыктаналларый, тугу ордук сэҥээрэллэрий, диэн туоһуласпыппар: “Ордук көмпүүтэр, тиэхиньикэ өттүгэр сыстаҕастар. Математика олимпиадатыгар улууска, өрөспүүбүлүкэҕэ миэстэлэһэллэр”, — диэн хоруйдуур. Онтон бэйэтэ элбэх оҕолоох ийэ буоларын быһыытынан иистэнэр, араас сувенирдары оҥорор, туостан киэргэллэри айан таһаарар. Кэлин М.К. Аммосов аатынан Хотугулуу-Илиҥҥи федеральнай университет Педагогикаҕа институтун бүтэрэн, алын кылаас учуутала идэтин баһылаабыт. Кыыллаах оскуолатыгар үлэлиир. Олоҕун аргыһа Степан Афанасьевич силиэсэрдиир.
Үрдүк наҕарааданы ылбыт сэттэ оҕо тапталлаах ийэтэ Любовь Торговкина соһуччута бэрдиттэн долгуйдум уонна олус үөрдүм диэн санаатын биллэрэр.
Людмила ПОПОВА, “Саха сирэ” хаһыат, edersaas.ru