Бүгүн, сэтинньи 28 күнүгэр, Бэрдьигэстээххэ уонна Баатаҕайга саҥа киинэ тыйаатырдара аһыллыахтара. Бу “Култуура” национальнай бырайыак чэрчитинэн арыллыахтаах сэттэ киинэ тыйаатырдарыттан маҥнайгылара.
edersaas.ru
Бэрдьигэстээх олохтоохторугар 186 миэстэлээх сааланы Сэмэн уонна Соппуруон Даниловтар ааттарынан Духуобунас киинигэр арыйыахтара. Бу киинэ тыйаатырын “Фонд Кино” тэрилтэ күрэҕэр кыайыы түмүгүнэн, федеральнай үп суотугар астылар. Саалаҕа аныгы лазернай киинэ проектор туруорулунна, саҥа кириэһилэлэр турдулар, билиэти ааҕар систиэмэ таҥылынна.
Баатаҕайга Арчы дьиэтигэр арыллар киинэ саалата икки сиртэн үбүлэннэ. Федеральнай киинтэн кэлбит харчыга кириэһилэлэри, 5 миэтирэ кэтиттээх экраны уонна проекторы атыыласпыттар, оттон саала өрөмүөнүн нэһилиэк бэйэтэ уйуммут. 60 олорор миэстэлээх киинэ тыйаатыра бу күннэртэн үлэтин саҕалыаҕа.
Өрөспүүбүлүкэтээҕи киинэ ситимэ дириэктэрэ Петр Чиряев этэринэн, киинэ тыйаатырдарыгар хас биирдиилэригэр 5 мөлүйүөн солкуобай кэриҥэ харчы көрүллүбүт. Бу күннэргэ Среднеколымскай куоракка кииинэ саалата аһыллыахтаах. Ол кэннэ Өлөөн, Томтор, Зырянка олохтоохторо аныгы саалаҕа киинэ көрөр кыахтаныахтара.
Егор Карпов, edersaas.ru